چەند راهێنەرێکی ناسراو بەربژێرن بۆ راهێنەرایەتی چێڵسی
بەشێوەیەکی چاوەڕواننەکراو یانەی چێڵسی ئینگلیزی هەڵوەشاندنەوەی بۆندی ماوریسیۆ پۆچێتینۆی لە ئەرکی راهێنەرایەتی یانەکەی راگەیاند.
پۆچێتینۆ تەنیا یەك وەرز راهێنەرایەتی یانە لەندەنییەکەی کرد و بە رەزامەندی هەردوولا گرێبەستەکەی هەڵوەشایەوە.
کریستیان فاڵك رۆژنامەنووسی رۆژنامەی بێڵدی ئەڵمانی ئاشکرایکردووە، کارگێڕی بلوز گرنگی بە هانز فلێك راهێنەری پێشووی ئەڵمانیا دەدەن، بۆئەوەی ئەرکی راهێنەرایەتی یانەکەیان وەربگرێت.
رۆژنامەنووسەکەی بێڵد دەڵێت: پێش پۆچێتینۆ کارگێڕی چێڵسی ویستوویانە گرێبەست لەگەڵ راهێنەرە ئەڵمانییەکە بکەن و ئێستا جارێکی دیکە بیر لە هەمان کار دەکەنەوە.
لە لایەکی دیکەوە رۆژنامەی سکای ئەڵمانیا نووسیویەتی: یانەی چێڵسی دەیەوێت تۆماس تۆخێل بکاتەوە راهێنەری یانەکەی، کە پێش دووساڵ لەو ئەرکەدا بوو.
رۆژنامەکە دەڵێت: تۆخێل بیر لە گەڕانەوە بۆ ستامفۆرد بریدج دەکاتەوە و پێی وایە هەندێك کار ماوە لە چێڵسی هێشتا تەواوی نەکردوون.
هەروەها رۆژنامەکە ئاماژەی بەوەشکردووە، رۆبێرتۆ دی زێربی یەکێكە لە بەربژێرانی دیکە بۆ ئەرکی راهێنەرایەتی یانە لەندەنییەکە و پێشتر رایگەیاندبوو، دوای کۆتایی ئەم وەرزە یانەی برایتنی ئینگلیزی بەجێدەهێڵێت.
