هەولێر لەگەڵ سەمیر بابۆ رێگەی سەرکەوتنی دۆزییەوە
یانەی هەولێر بۆ یەکەمجار بە راهێنەرایەتی سەمیر بابۆ سەرکەوتنی تۆمارکرد و بە سێ خاڵ و سێ گۆڵ لە بەغدا گەڕایەوە.
لە گەڕی 31ی خولی ئەستێرەکانی عێراق، یانەی هەولێر لە دەرەوەی یاریگەی خۆی رووبەڕووی یانەی ئەمانەی بەغدا بووەوە و یارییەکەی بە سێ گۆڵ بەرامبەر گۆڵێك لێبردەوە.
شێرکۆ کەریم دوای تۆمارکردنی گۆڵێك و پیشاندانی ئاستێکی بەرز بە باشترین یاریزانی یاریی هەولێر و ئەمانەی بەغدا دیاریکرا.
سەمیر بابۆ دووەم یارییە سەرپەرشتی یانەی هەولێر دەکات و هەردوو یارییەکەی لە دەرەوەی یاریگەی خۆی بووە، لە یەکەم یاریی بەرامبەر زاخۆ تووشی شکست بوو، لە یاریی بەرامبەر ئەمانەی بەغداش سەرکەوتنی تۆمارکرد.
بابۆ لە کۆنگرەی رۆژنامەوانی دوای یارییەکە گوتی: ئەم سەرکەوتنە بۆ ئێمە زۆر گرنگ بوو، دەستخۆشی لە یاریزانەکان دەکەم و ئاستێکی نموونەییان پێشکەشکرد.
یانەی هەولێر ئەم وەرزە بە دۆخێکی سەختدا تێپەڕدەبێت و بە کۆکردنەوەی 31 خاڵ لە 29 یاریی، ریزبەندی 14ی خولی ئەستێرەکانی عێراقی گرتووە و دوو یاریی دواخراوی ماوە.
