کەشناسیی عێراق پێشبینی خۆڵبارین و بەرزبوونەوەی پلەکانی گەرما دەکات
دەستەی کەشناسی عێراق پێشبینییەکانی بۆ کەشوهەوای چەند ڕۆژی داهاتوو بڵاوکردەوە و پێشبینی خۆڵبارین و بەرزبوونەوەی پلەکانی گەرما دەکات.
بە گوێرەی پێشبینییەکانی دەستەکە، سبەی دووشەممە، ئاسمان ساڵ و ڕێژەیەکی کەمی خۆڵبارینی دەبێت، بە گشتیی کەشوهەوای هەرێمی کوردستان مامناوەند دەبێت، بەڵام پلەکانی گەرما لە ناوچەکانی ناوەڕاست و باشوور عێراق بەراورد بە ڕۆژانی ڕابردوو، چەند پلەیەک بەرز دەبێتەوە.
هەروەها سێشەممە و چوارشەممە بە شێوەیەکی گشتیی کەشوهەوا لە هەرێمی کوردستان مامناوەند دەبێت و لە شارەکانی عێراق پلەکانی گەرما تاڕادەیەک بەرز دەبنەوە.
سەبارەت بە کەشوهەوای ڕۆژی پێنجشەممە، دەستەکە پێشبینی دەکات، کەشوهەوای هەرێمی کوردستان مامناوەند بێت و چەند پەڵە هەورێک هەبێت. بەڵام لە ناوچەکانی ناوەڕاست و باشووری عێراق بە گشتی، پلەکانی گەرما نزیک دەبن لە تۆمارەکانی گەرمای چوارشەممە.
