بەردی بناغەی دوو پرۆژەی خزمەتگوزاری لە سنووری سۆران دانرا
بە گوژمەی زیاتر لە یەک ملیار و 509 ملیۆن دینار، بەردی بناغەی دوو پرۆژەی خزمەتگوزاری لە سنووری ئیدارەی سەربەخۆی سۆران دانرا.
ڕۆژی پێنجشەممە، 04-07-2024، لەسەر راسپاردەی مەسرور بارزانی، سەرۆکی حکوومەتی هەرێمی کوردستان و لەژێر چاودێریی هەڵگورد شێخ نەجیب، سەرپەرشتیاری ئیدارەی سەربەخۆی سۆران؛ بە گوژمەی یەک ملیار و 509 ملیۆن و 553 هەزار و 500 دینار، بەردی بناغەی قیڕتاوکردنی کۆڵانە ناوخۆییەکان و دروستکردنی ئاوەڕۆی سندووقی لە قەزای سیدەکان دانرا.
هەڵگورد شێخ نەجیب، سەرپەرشتیاری ئیدارەی سەربەخۆی سۆران، لە رێوڕەسمەکەدا ڕایگەیاند، ئەو دوو پرۆژەی ئەمڕۆ بەردی بناغەیان بۆ دانراوە، تەواوکەریی ئەو پرۆژانەن کە لە ماوەی ڕابردوودا لەو سنوورە جێبەجێ کراون و پلان و بەرنامەی دیکەشیان بۆ جێبەجێکردنی چەند پرۆژەیەک لە داهاتوودا هەیە.
بە گوتەی هەڵگورد شێخ نەجیب، کێشە و ئاڵۆزییە سەربازییەکان بە درێژایی ساڵانی ڕابردوو، ڕێگربوونە لەوەی نەتوانن وەکو پێویست لە ڕووی گەشتیاری و ئابوورییەوە سوود لە دەڤەری سیدەکان وەربگرن و گوتی، "هاووڵاتی و جووتیارانی ناوچەکە قوربانیی یەکەمی ئەو ئاڵۆزییە سەربازییانە بوونە. ئەگەر ئەو کێشانە نەبوونایە، دەتوانرا چەندین پرۆژەی گەورەی گەشتیاری لە دەڤەرەکە جێبەجێ بکرێن".
وەکو ئەوەی سەرپەرشتیاری ئیدارەی سەربەخۆی سۆران باسی کرد، ئەگەر کێشە و ئاڵۆزییە سەربازییەکان لە سنووری سیدەکان نەبوونایە "دەتوانرا زووتر دەروازەی کێلەشین بە ڕووی هاووڵاتییاندا کرابایەوە و جووڵەی بازرگانیش دەچووە ئاستێکی دیکە. هەروەها دەتوانرا لە ڕووی ئاژەڵدارییەوە سوودێکی زۆر لەم دەڤەرە وەربگیرێت".
حکوومەتی هەرێمی کوردستان، وەکو ئەوەی هەڵگورد شێخ نەجیب جەختی لێ کردەوە، بەردەوام دەبێت لە پێشکەشکردن و گەیاندنی خزمەتگوزارییەکان بۆ سنووری ئیدارەی سەربەخۆی سۆران و بەتایبەت گوندەکان.
ڕۆژی (28ـی ئایاری 2024)، سه‌رۆكوه‌زیران مه‌سرور بارزانی دوای دانانی چەند پرۆژەیەک لە ئیدارەی سەربەخۆی سۆران؛ له هه‌ژماری تایبه‌تی خۆی له تۆڕی كۆمه‌ڵایه‌تی ئێكس (تویته‌ری پێشوو) ڕایگەیاند: "خەڵکی دەڤەری سۆران قوربانییەکی زۆریان داوە و شایستەی ئەوەن وەک هەموو ناوچەکانی دیکەی کوردستان خزمەتیان بکرێت".
ئەو پرۆژانەی سەرۆکوەزیران مەسرور بارزانی بەردی بناغەیان بۆ دانان، بریتی بوون لە (ڕێگەی دووسایدی 40 مەتریی هۆڵی بۆنەکان – شەهیدانی ئازادی، پارکی ناوشار، پارکی نیشتمانی و ئۆڤەرپاسی دەروازەی سۆران) و دواتریش سەرۆکی حکوومەتی هەرێمی کوردستان پرۆژەی "ئەکواپارکی میرۆ لە شنگلبانێ" لە قەزای رواندز، لە سنووری ئیدارەی سەربەخۆی سۆران کردەوە.
