فراکسیۆنی پارتی لە ئەنجوومەنی پارێزگای کەرکووک لەگەڵ سەرۆکوەزیرانی عێراق کۆبوونەوە
K24 - کەرکووک:
فراکسیۆنی پارتی لە ئەنجوومەنی پارێزگای کەرکووک لەگەڵ سەرۆکوەزیرانی عێراق کۆبوونەوە و دوا هەنگاوەکانی پێکهێنانی حکوومەتی خۆجێیی کەرکووکیان تاوتوێ کرد.
ئەمرۆ کاتژمێر 3 دوای نیوەڕۆ، فراکسیۆنی پارتی لە ئەنجوومەنی پارێزگای کەرکووک، لەگەڵ محەممەد شیاع سوودانی، سەرۆک وەزیرانی عیراق کۆبوونەوە و دواهەنگاوەکانی پێکهێنانی حکوومەتی خۆجێی کەرکووکیان تاوتوێکرد.
لەو بارەیەوە، حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک بە کوردستان24ـی ڕاگەیاند: هەردوولا هاوڕابوونە لەسەر ئەوەی دەبێت سەرجەم پێکهاتەکان بەشداری لە پێکهێنانی حکوومەتی خۆجێیی بکەن و هیچ پێکهاتەیەک پشتگوێ نەخرێت.
گوتیشی: سەرۆکوەزیرانی عێراق ڕایگەیاندووە، کە دەبێت پەلە بکرێت لە کۆبوونەوەی ئەنجوومەنی پارێزگای کەرکووک پێش تەواوبوونی ماوەی یاسایی، تاوەکو بتواندرێت پارێزگارێکی نوێ بۆ کەرکووک دیاری بکرێت.