بلینکن: گەیشتن بە ڕێککەوتنی ڕاگرتنی شەڕی غەززە کەمێکی ماوە

ئەنتۆنی بلینکن، وەزیری دەرەوەی ئەمەریکا ڕایگەیاند، گەیشتن بە ڕێککەوتنی ئاساییکردنەوەی پەیوەندیی نێوان ئیسرائیل و سعودییە هێشتا ئەگەری هەیە پێش کۆتایی هاتنی خولی سەرۆکایەتی جۆو بایدن، سەرۆکی ئەمەریکا بێت.

بلینکن ئاماژەی بەوەش دا، ڕێککەوتنەکە سەرەتا پێویستی بە ئاگربەست لە غەززە دەبێت، جگە لە ڕەزامەندی ئیسرائیل بۆ ڕێگەیەکی باوەڕپێکراو بەرەو دامەزراندنی دەوڵەتی فەڵەستین، ئەویش بە پێداگریی سعودییە و بنیامین ناتانیاهۆ، سەرۆکوەزیرانی ئیسرائیلش  بە یەکجاری ئەوە ڕەت دەکاتەوە.

بلینکن دەڵێت: ئەم بابەتە کارێکی زۆری دەوێت، بەڵام ئیسرائیل و سعودییە سەلماندوویانە کردووەتەوە، کە ئارەزووی ڕێککەوتنێکی لەو شێوەیە دەکەن.

ناوبراو لە درێژەی قسەکانیدا گوتیشی: پێموایە ئەگەر بتوانین بە ئاگربەست لە غەززە بگەین، هێشتا دەرفەتێک دەمێنێتەوە بۆ ئەوەی لە ژێر ئەم ئیدارەیەدا ئاساییکردنەوەکان بەرەو پێش بچن.

بلینکن دووپاتی کردەوە، نزیکەی 90%ـی ئاگربەست لە غەززە ڕێککەوتنی لەسەر کراوە، بەڵام پرسگەلێکی زۆر گرنگ هەن کە هێشتا هەڵپەسێردراون، لەوانە پرسی بەناو میحوەری فیلادلفیا لە کۆتایی باشووری کەرتی غەززە لەسەر سنوور لەگەڵ میسر. بەوەش واشنتۆن لە چەند ڕۆژی داهاتوودا بیرۆکەی زیاتر دەخاتە سەر مێزی دانوستان.

بلینکن دەشڵێت: پێشبینی دەکەم لە ڕۆژانی داهاتوودا بگەین بە چۆنیەتی چارەکردنی کێشەکان لەگەڵ هەرسێ لایەن ئیسرائیل و (قەتەر و میسر) بە حەماس.

لەلایەکی دیکەوە بنیامین ناتانیاهۆ، سەرۆکوەزیرانی ئیسرائیل بە تۆڕی فۆکسی ڕاگەیاند، تاکوو ئێران لە هەوڵی پڕ چەککردنی غەززەبێت، نزیک نین لە دانووستانەکان، بەڵام هەموو هەوڵێکی خۆمان دەدەین بۆ ئەوەی بگەین بە ڕێککەوتن.

ڕۆژی 7ـی ئۆکتۆبەری 2023، چەکدارەکانی بزووتنەوەی حەماس هێرشێکی بەرفراوانیان کردە سەر ئیسرائیل، لە هێرشەکەدا زیاتر لە هەزار و 400 ئیسرائیلی کوژران و سەدانی دیکەش بریندار بوون، هاوکات  240 هاووڵاتیی ئیسرائیل وەکوو بارمتە لەلایەن حەماسەوە ده‌ستبه‌سه‌ر كران.