به‌ وێنه‌: هێزه‌ عێراقییه‌كان قه‌زای حه‌مدانییه‌ گه‌مارۆ ده‌ده‌ن

K24 – هه‌ولێر:

هونه‌ر ئه‌حمه‌د په‌یامنێری كوردستان 24 له‌ به‌ره‌كانی شه‌ڕی سوپای عێراق له‌ ده‌وروبه‌ری قه‌زای حه‌مدانییه‌ رایگه‌یاند" ئێستا هێزه‌ عێراقییه‌كان له‌ "3" میحوه‌ره‌وه‌ گه‌مارۆی سه‌نته‌ری قه‌زاكه‌یان داوه‌ و پێشڕه‌وی به‌رده‌وامه‌ بۆ كۆنترۆڵكردنی ئه‌و ناوچه‌یه‌ و ئێستاش كێوماڵی گونده‌ رزگاركراوه‌كان له‌و ده‌ڤه‌رانه‌دا به‌رێوه‌ ده‌چێت.

هه‌روه‌ها له‌ ئاسمانه‌وه‌ فڕۆكه‌ جه‌نگییه‌كان پاڵپشتی هێزه‌ عێراقییه‌كان ده‌كه‌ن و مۆڵگه‌ و باره‌گاكانی داعش بۆردوومان ده‌كه‌ن.

به‌گوێره‌ی زانیارییه‌كا له‌وه‌ته‌ی ده‌ستپێكردنی ئۆپه‌راسیۆنی سه‌ربازی كۆنترۆڵكردنه‌وه‌ی موسڵ ده‌ستیپێكردووه‌، له‌ میحوه‌ره‌كانی گوێر و گه‌یاره‌ و باشووری شاره‌كه‌وه‌ هێزه‌ عێراقییه‌كان توامنیوویانه‌ پێشڕه‌وی بكه‌ن و وه‌ك فه‌رمانده‌ سه‌ربازییه‌كانی عێراق ده‌ڵێن" له‌ ماوه‌ی سی رۆژی رابردوو تا ئێستا توانیویانه‌ له‌ باشووری مووسڵ و رۆژهه‌ڵاتی شاره‌كه‌ "352" كیلۆمه‌تر چوارگۆشه‌ رزگار بكه‌ن.

له‌ كاتێكدا له‌ یه‌كه‌م رۆژی ده‌ستپێكرردنی شه‌ڕی موسڵ له‌ ناوچه‌كانی باكوور و باكووری رۆژهه‌ڵاتی شاره‌كه‌دا هێزه‌كانی پێشمه‌رگه‌ توانییان پێشڕه‌وی بكه‌ن و سه‌رۆكی هه‌رێمی كوردستان له‌ دوای به‌ ئه‌نجام گه‌یشتنی ئۆپه‌راسیۆنی ئه‌و میحوه‌ره‌ له‌ كۆنگره‌یه‌كی رۆژنامه‌وانیدا له‌ خازر رایگه‌یان" كه‌ هێزی پێشمه‌رگه‌ی كوردستان له‌ ماوه‌ی چه‌ند كاتژمێرێكدا "200" كیلۆمه‌تری چوارگۆشه‌یان كۆنترۆڵكردووه‌ته‌وه‌.