ئاسایشی كەركوك دەست بەسەر بڕێكی زۆری چەک و تەقەمەنی دەگرێت

K24 - ھەولێر

ئاسایشی كەركوك لە ماڵی دوو گومانلێكراو دەست بەسەر بڕێكی زۆری چەك و تەقەمەنی دەگرێت و ھەردووكیانیشی دەستگیر ده‌كات.

ئاسایشی كه‌ركوك لە راگەیاندراوێكدا ژمارە و ناوی ئەو چەك و تەقەمەنیانە ئاشكرا دەكات، كە ھێشتا ھۆكاری بوونی ئەو ژمارە چەك و تەقەمەنییە لە ماڵی ئەو دوو گومانلێكراوە ئاشكرا نەكراوە.

دەقی راگەیاندراوی ئاسایشی كەركوك

شەوی رابردوو دواى كوكردنەوەی زانیاری و بەدواداچوونی ورد ھێزەکانمان لە ھەڵمەتێکی گەران و پشکنیندا بە ھاوبەشی لەگەل ھێزەکانی پۆلیس لە گەڕەکی  پەنجا عەلی  شاری کەرکوک توانیویان دوو گومانلێکراو دەستگیر بکەن بە ناوەکانی (ی.ع.ع) و (ب.ع.ع).

 ئەم دوو گومانلێکراوە ژمارەیەکی زۆر چەک و تەقەمەنیان لە ماڵی خۆیان حەشار دابوو کە بریتی بوو لە (بڕێک مادەی سیفۆر ، دوو قاعيدەی کاتیوشا ، یەک کلاشینکۆف ، یەک غەدارە ، یەک چەکی (m16) ، یەک گولە ئار پی چی، نارنجۆکی دەستی و ھەروەھا ژمارەیەک فیشەک و مەخزەنی دەمانچە و کلاشینکۆف و حەربە و نازور و خوذه و لاپتۆپ و مۆبایل).

 تا ئێستا لێکۆڵینەوە لەگەڵ ئەو دوو گومانلێکراوە بەردەوامە بۆ زانینی ھۆکاری بوونی ئەو ژمارە زۆرە چەک و تەقەمەنییە لە ماڵەکەیاندا.

راگەیاندنی ئاسایشی کەرکوک

2017/3/24