فراكسیۆنی پارتی لەبارەی ھەڵكردنی ئاڵای كوردستان لە كەركووك راگەیەندراوێك بڵاودەكاتەوە

K24 - ھەولێر

لەبارەی پەسندكردنی بڕیاری ھەڵكردنی ئاڵای كوردستان لەسەر دامودەزگا حكوومییەكانی كەركووك، فراكسیۆنی پارتی دیموكراتی كوردستان لە پەرلەمانی كوردستان راگەیەندراوێك بڵاودەكاتەوە و پشتیوانی خۆیان بۆ بڕیارەكەی ئەنجوومەنی پارێزگا و خەڵكی كەركووك دەردەبڕن.

لە راگەیەندراوەكەی فراكسیۆنی پارتی ھاتووە: " ئەمڕۆ لە مێژووی کوردستاندا، رۆژێکی گرنگە، چونکە دوای ئەو ھەموو خەبات و قوربانییدانە، دوای بڕینی ئەو ھەموو قۆناغە جیاوازانەی کە گەلەکەمان لە مێژووی خۆییدا بڕیونی، ئەمڕۆ بۆ یەکەمجار بەشێوەیەکی فەرمی و یاسایی لەلایەن ئەنجوومەنی پارێزگای کەرکووکەوە، بڕیاری ھەڵکردنی ئاڵای کوردستان لە پاڵ ئاڵای عێراق لەسەر باڵەخانەی دامودەزگا فەرمییەکانی ئەو پارێزگەیە درا، کە ئەمەیش بۆ گەلەکەمان و یەکلاکردنەوەی پرسی ناوچە دابرێنراوەکانی دەرەوەی ئیدارەی ھەرێم، رووداوێکی گرنگ و مێژووییە".

لە بەشێكی دیكەی راگەیەندراوەكەدا ئاماژە بۆ ئەوە كراوە: "کەرکووک نە لە رابردوودا و نە لە ئێستادا و نە لە داھاتووشدا، بۆ یەک لەحزە لە کوردستان جیانەبووەتەوە و جیایش نابێتەوە، بۆیە پاڵپشتی تەواوی ئەو بڕیارەی ئەنجوومەنی پارێزگا و کەرکووکییەکان دەکەین، پێمانوایە ئەو بڕیارە، بڕیاری شەھیدانی بزووتنەوەی رزگاریخوازی کوردستان و قوربانییەکانمان و تەواوی خەڵکی کوردستانیشە".

دەقی راگەیەندراوەکەی فراکسیۆنی پارتی لە پەرلەمانی کوردستان

ڕاگەیاندراوێک لە فراکسیۆنی پارتی دیموکراتی کوستان سەبارەت بە ھەڵکردنی ئاڵای کوردستان لە پارێزگەی کەرکووک:

دوای خەباتێکی درێژخایەنی گەلەکەمان، لە پێناو ئازادی و بە دەستھێنانی مافە زەوتکراوەکانی، ئێستا کوردستان گەیشتۆتە ئاستێک، کە کاریگەری بەسەر بریارە سیاسییەکانی ناوچەکە و جیھانەوە ھەیە، ئەمەیش ئەنجامی ئەو خەباتە دوور و درێژەیە، کە لە پێناو دۆزە ڕەواکەیدا کردوویەتی و بۆ یەکجاریش لە بەھا مرۆڤایەتییەکان لای نەداوە.

ئەمڕۆ لە مێژووی کوردستاندا، ڕۆژێکی گرنگە، چونکە دوای ئەو ھەموو خەبات و قوربانییدانە، دوای بڕینی ئەو ھەموو قۆناغە جیاوازانەی کە گەلەکەمان لە مێژووی خۆییدا بڕیونی، ئەمڕۆ بۆ یەکەمیجار بەشێوەیەکی فەرمی و یاسایی لە لایەن ئەنجومەنی پارێزگەی کەرکووکەوە، بڕیاری ھەڵکردنی ئاڵای کوردستان لە پاڵ ئاڵای عێراق لەسەر باڵەخانەی دامودەزگە فەرمییەکانی ئەو پارێزگەیە درا، کە ئەمەیش بۆ گەلەکەمان و یەکلاکردنەوەی پرسی ناوچە دابرێنراوەکانی دەرەوەی ئیدارەی ھەرێم، ڕووداوێکی گرنگ و مێژووییە.

بەم بۆنەیەوە، دەستخۆشی لە جەنابی پارێزگاری کەرکووک و ئەندامانی ئەنجومەنی پارێزگا و تەواوی ئەو کەس و لایەنانە دەکەین، کە بەو بابەتە چارەنووسسازەوە ماندوو بوون، ھەروەھا پیرۆزبایی لە خۆمان و تەواوی خەڵکی کوردستان و کەسوکاری شەھیدان و کەرکووکییەکان دەکەین و پێمانوایە کەرکووک نە لە ڕابردوودا و نە لە ئێستادا و نە لە داھاتوویشدا، بۆ یەک لەحزە لە کوردستان جیانەبووەتەوە و جیایش نابێتەوە، بۆیە پاڵپشتی تەواوی ئەو بڕیارەی ئەنجومەنی پارێزگە و کەرکووکییەکان دەکەین، پێمانوایە ئەو بریارە، بریاری شەھیدانی بزووتنەوەی رزگاریخوازی کوردستان و قوربانییەکانمان و تەواوی خەڵکی کوردستانیش.

فراکسیۆنی پارتی دیموکراتی کوردستان لە پەرلەمانی کوردستان

28/3/2017