بەرپرسی دروستكردنی مووشەكی كیمیایی داعش كوژرا
یەكێك بووە لە كەسە نزیكەكانی بەغدادی و لە دروستکردنی مووشەکی هەڵگریی ماددەی کیمیایی شارەزاییەکی زۆری هەبووە
K24 - ھەولێر
سەرچاوەیەکی ئەمنی ئاشکرایکرد، لە ئەنجامی تەقینەوەیەکدا بەرپرسی کەتیبەی دروستکردنی مووشەکی هەڵگریی ماددەی کیمیایی داعش لە رۆژئاوای مووسڵ و 5 چەکداری دیکەی داعش کوژران.
سەرچاوەیەکی ئەمنی لە پارێزگای نەینەوا بە میدیاکانی عێراقی راگەیاندووە، لەکاتی دروستکردنی مووشەکی هەڵگریی ماددەی کیمیایی لەلایەن چەکدارانی داعش لە گەڕەکی 17 تەمموزی رۆژئاوای مووسڵ، تەقینەوەیەک روویداوە، بەوهۆیەشەوە بەرپرسی کەتیبەی گازی کیمیایی داعش بە ناوی عەبدولعەزیز شیشانی و 5 چەکداری دیکەی داعش کوژراون.
سەرچاوەکە ئاماژەی بەوەشدا، عەبدولعەزیز شیشانی، یەکێک لە نزیکەکانی ئەبوبەکر بەغدادییە و لە دروستکردنی مووشەکی هەڵگریی ماددەی کیمیایی شارەزاییەکی زۆری هەبووە.