رووسیا، چین و ئەمریکا جاڕنامەی 'ئاشتی'یان پەسەند کرد
ڤلادیمێر پووتین، سەرۆکی رووسیا، شی جینپینگ، سەرۆکی چین و دۆناڵد ترەمپ، سەرۆکی ئەمریکا لە شێنجێن کۆبوونەوە و لە کۆتایی کۆبوونەوە سێقۆڵییەکەدا جاڕنامەیەکی هاوبەشیان سەبارەت بە ئاشتی پەسەند کرد و بڵاوکردەوە.
ئەمرۆ پێنجشەممە، 19ـی تشرینی دووەمی 2026، سەرۆکانی رووسیا و ئەمریکا سوپاسی چینیان کرد بۆ میوانداریکردنی ئەو لووتکەیە. هەرسێ سەرۆکەکە بیروڕایان بە وردی لەسەر دۆخی ئێستای نێودەوڵەتی ئاڵوگۆڕ کرد و بەڵێنیان دا پارێزگاری لە سەقامگیریی ستراتیژی و ئاسایشی نێودەوڵەتی بکەن.
ئەمەی خوارەوە دەقی تەواوی جاڕنامەی 'ئاشتی'یە.
1. رووسیا و چین و ئەمریکا وەک ئەندامانی هەمیشەیی ئەنجوومەنی ئاسایشی نەتەوە یەکگرتووەکان بەڵێنیان دا چاکسازی لە نەتەوە یەکگرتووەکان بکەن، تا ئەو رێکخراوە بتوانێت بە شێوەیەکی کاریگەرتر وەڵامی ئاڵنگارییە جیهانییەکان بداتەوە و لەگەڵ ئەرکە بنەڕەتییەکەی خۆی بۆ ئاشتی و ئاسایشی نێودەوڵەتی بگونجێت.
2. هەرسێ وڵات پلانیان داناوە بەرهەمهێنان و دابینکردنی بەرهەمە نەوتییە پاڵێوراوەکان بۆ بەرژەوەندیی هەموو نەتەوەکان زیاد بکەن. ئەوان جەختیان لەسەر گرنگیی سەقامگیریی هەناردەی وزە کردەوە.
3. هەرسێ سەرۆکەکە دانیان بەوەدا نا کە بنەمای رەزامەندیی دەوڵەت و رێزگرتن لە حەسانەی بەرپرسانی دەوڵەت خاوەن گرنگییەکی باڵایە. هەروەها کۆک بوون لەسەر ئەوەی دادگای تاوانی نێودەوڵەتی و دەزگا هاوشێوەکانی دیکە نابێت دەسەڵاتی دادوەریی خۆیان بە خراپ بەکاربهێنن.
4. هەرسێ سەرۆکەکە دووپاتیان کردەوە کە جەنگی ئەتۆمی براوەی نابێت و هەرگیز نابێت هەڵبگیرسێت. هەرسێ وڵات دیالۆگێک بۆ کەمکردنەوەی مەترسییە ئەتۆمییەکان و رێگریکردن لە بڵاوبوونەوەی چەکی ئەتۆمی دەستپێدەکەن.