ژيانى سياسى تاڵه‌بانى له‌ ده‌يان وێنه‌دا ببينه‌

K24 – هه‌ولێر:

مام جه‌لال تاڵه‌بانى ئه‌و كه‌سايه‌تييه‌ى هه‌ر له‌ ده‌يه‌ى په‌نجا و شه‌سته‌كانى سه‌ده‌ى رابردووه‌وه‌ هاتووه‌ته‌ ناو كايه‌ى رۆشنبيرى و سياسى و بزاڤى رزگاريخوازى نه‌ته‌وه‌يى كورد، له‌ ماوه‌ى ژيانى سياسى و تێكۆشانى له‌ رێگه‌ى رزگارى كوردستاندا، به‌ كه‌سايه‌تييه‌كى ديبلۆماسى ناودارى كورد و عێراق و ناوچه‌كه‌ ده‌ناسرا و تواناى ئه‌و بۆ چاره‌سه‌ركردنى كێشه‌كان و دۆزينه‌وه‌ى رێگه‌چاره‌ى گونجاو له‌ لايه‌ن يار و نه‌يارانييه‌وه‌ ئاماژه‌ى پێكراوه‌.

له‌ ژيانى سياسى خۆيدا تاڵه‌بانى هه‌ر له‌ سه‌ره‌تاى گه‌نجييه‌وه‌ په‌ره‌ى به‌ تواناى ديبلۆماسى خۆيى داوه‌ و هێشتا گه‌نج بوو، به‌ نوێنه‌رايه‌تى مسته‌فا بارزانى رابه‌رى نه‌ته‌وه‌يى كورد سه‌ردانى ميسرى كرد و چاوى به‌ سه‌ركرده‌ى هه‌ره‌ ديارى عه‌ره‌ب جه‌مال عه‌بدولناسر كه‌وت.

تاڵه‌بانى له‌ ناوه‌نده‌ نێوده‌وڵه‌تييه‌كان كه‌سايه‌تييه‌كى ناسراوى سياسى بوو و تواناى ئه‌و بۆ خۆنوێكردنه‌وه‌ و خۆ نه‌به‌ستنه‌وه‌ به‌ ئايدۆلۆژيايه‌كى تايبه‌ته‌وه‌ وايكردبوو، له‌ يه‌ك كاتدا له‌گه‌ڵ جه‌مسه‌ره‌ ناكۆكه‌كانى سياسه‌ت له‌ ئاستى ناوچه‌كه‌ و جيهاندا سياسه‌ت بكات و وه‌ك له‌ ميدياى نێوده‌وڵه‌تييدا ئاماژه‌ى بۆ ده‌كرا يه‌كه‌م سياسه‌تمه‌دارى جيهان بوو كه‌ له‌ يه‌ككاتدا ئه‌حمه‌دى نه‌ژاد سه‌رۆك كۆمارى پێشووى ئێران و كۆنداليزا رايسى وه‌زيرى ده‌ره‌وه‌ى پێشووى ئه‌مريكاى ماچ كردبوو.