حەشدی شەعبی رێگری لە دەست بەكاربوونی قایمقامی داقوق دەكات

K24 - ھەولێر

ژمارەیەك پەرلەمانتاری یەكێتی سەردانی داقوقیان كردووە و رایانگەیاندووە، دۆخی داقوق ئارامە و قایمقام دەست بەكار دەبێتەوە، دوای ئەوە لایەنگرانی حەشدی شەعبی لە داقوق خۆپێشاندانیان دژی ھاتنەوەی قایمقام ئەنجامدا.

سەرچاوەیەك لە داقوق بە كوردستان24 راگەیاند: "دوێنی ژمارەیەك لە پەرلەمانتارانی یەکێتی لەگەڵ قایمقامی داقوق سەردانی داقوقیان کردوو، رایانگەیاند، رەوشی قەزاکە ئارامە و لەبەیانییەوە قایمقام دەسبەکاردەبێتەوە، بەڵام حەشدی شەعبی رێگری لە دەست بەكاربوونەوەی قایمقام دەكەن، بۆ ئەمەش لایەنگرانی حەشدی شەعبی لە داقوق خۆپێشاندانێكیان رێكخست و درووشمیان دژی دەست بەكاربوونەوەی قایمقام بەرزكردەوە".

دوای ئەوەی لە 16 ئۆكتۆبەر كەركووك و ناوچە كوردستانییەكانی دەرەوەی ئیدارەی ھەرێم، لەلایەن حەشدی شەعبی بە پاڵپشتی ئێران داگیركران، خەڵكی داقوقیش وەك ناوچەكانی دیكە لەلایەن چەكدارانی ئازار دەدرێن، بەڵام ھەندێك لە پەرلەمانتار و بەرپرسانی یەكێتی دەڵێن، رەوشی كەركووك و ناوچەكانی دیكە ئارامە.