ڤاڵڤێردی گۆڕانكارییه‌كانی یانه‌كه‌ی بۆ یارییه‌كه‌ی سبه‌ی راگه‌یاند

یانه‌ی بارسێلۆنا سبه‌ی یه‌كشه‌ممه‌ له‌ نێو یاریگه‌ی خۆی له‌ كامپ نوو یه‌كه‌مین یاری له‌ لالیگا له‌ 2018 به‌رامبه‌ر لیڤانتی ده‌كات، راهێنه‌ری بارسا گۆڕانكاری له‌ پێكهاته‌ی كردووه‌ و باسی كۆتینهۆش ده‌كات.

ئه‌مڕۆ شه‌ممه‌، 6 جه‌نیوه‌ری 2018، له‌ پرێس كۆنفرانسێكدا له‌ باره‌ی یارییه‌كه‌ی سبه‌ی به‌رامبه‌ر لیڤانتی، ئارنیستۆ ڤاڵڤێردی راهێنه‌ری یانه‌ی بارسێلۆنا یارییه‌كه‌ی به‌ ئاڵۆز و قورس وه‌سف كرد، ده‌شڵێت: ده‌بێت هه‌وڵبده‌ین جیاوازی خاڵه‌كانمان له‌گه‌ڵ ركابه‌ره‌كانمان زیاتر بكه‌ین.

له‌ باره‌ی كۆتینهۆ، ڤاڵڤێردی گوتی: كۆتینهۆ یاریزانێكی گرینگ و گه‌وره‌یه‌، نامه‌وێت قسه‌ی زیاتر له‌ باره‌ی ئه‌و یاریزانه‌ بكه‌م، ده‌بێت چاوه‌ڕوانی كارگێرانی بارسا بكه‌ن و بزانن چی نوێ له‌ باره‌ی ئه‌و یاریزانه‌ راده‌گه‌یه‌نن.

ڤاڵڤێردی ده‌شڵێت: نامه‌وێت چیتر باسی كۆتینهۆ بكه‌م، به‌ڵكوو ده‌مه‌وێت ته‌نیا بیر له‌ یاریزانه‌كانی ئێستای بارسا بكه‌مه‌وه‌، كه‌ لای من زۆر به‌نرخ و خۆشه‌ویستن.

له‌ باره‌ی ئه‌و بڕگه‌ و به‌ندانه‌ی له‌ گرێبه‌سته‌كه‌ی مێسی دا هاتووه‌، ڤاڵڤێردی گوتی: ئه‌وانه‌ شتی تایبه‌تن و رێككه‌وتنی نێوان بارسا و یاریزانه‌كه‌یه‌، بۆیه‌ من نامه‌وێت ده‌رباره‌ی ئه‌م باسه‌ش قسه‌ بكه‌م.

ڤاڵڤێردی گوتیشی: بۆ یارییه‌كه‌ی سبه‌ی ئارنایزی ئه‌ستێره‌ی لاوم بۆ تیپی یه‌كه‌م سه‌رخستووه‌، له‌ داهاتووشدا چاوم له‌سه‌ر (ئالینا)ـش ده‌بێت و ئه‌ویش ده‌بێت چاوه‌ڕوانی ده‌رفه‌ت بكات بۆ ئه‌وه‌ی له‌ تیپی یه‌كه‌می بارسا یاری بكات.

له‌ باره‌ی یاریكردنی عوسمان دێمبلی له‌ پێكهاته‌ی سه‌ره‌كی، ڤاڵڤێردی گوتی: یاریكردن له‌ پێكهاته‌ی سه‌ره‌كی ده‌رفه‌تێكی كراوه‌یه‌ بۆ سه‌رجه‌م یاریزانه‌كان، دێمبلی لای ئێمه‌ گرینگه‌، به‌ڵام ماوه‌یه‌كی دوور و درێژه‌ به‌هۆی پێكانه‌وه‌ دابڕاوه‌، ده‌مانه‌وێت هه‌نگاو به‌ هه‌نگاو له‌گه‌ڵی بڕۆین تا به‌ته‌واوه‌تی توانای جه‌سته‌یی بۆ ده‌گه‌ڕێته‌وه‌ و سبه‌یش له‌ یارییه‌كه‌ ده‌یبینن.

له‌ باره‌ی رافینها و دیۆلۆفیۆ، راهێنه‌ری بارسا گوتی: من ته‌نیا ده‌توانم 18 یاریزان بانگهێشتی یارییه‌كان بكه‌م، ئه‌وان بۆ سبه‌ی له‌گه‌ڵ ئێمه‌ نابن.

له‌ گه‌ڕی 18ـه‌می لالیگا، یانه‌ی بارسێلۆنا سبه‌ی یه‌كشه‌ممه‌ له‌ كاتژمێر 06:15 خوله‌ك به‌ كاتی هه‌ولێر میوانداریی یانه‌ی لیڤانتی ده‌كات، بارسا بۆ ئه‌م یارییه‌ به‌بێ سێرخیۆ بۆسكێتس یاری ده‌كات كه‌ به‌هۆی كه‌ڵه‌كه‌بوونی كارته‌كانی راگیراوه‌، ئالكاسێر، ئۆمتیتی و ئاردا توران به‌هۆی پێكانه‌وه‌ دوور خراونه‌ته‌وه‌.