سبه‌ی به ‌فه‌رمی ماسكێرانۆ بۆ خولی چینی به‌ڕێده‌كه‌وێت

رۆژنامه‌ی ئاسی ئیسپانی ئاشكرای كردووه‌ سبه‌ی چوارشه‌ممه‌ به‌فه‌رمی ماسكێرانۆ ناوی له‌ لیستی یانه‌ی بارسێلۆنا ده‌سڕدرێته‌وه‌ و درێسی ژماره‌ 14 بۆ كۆتینیۆ جێده‌هێڵێت.

هه‌مان سه‌رچاوه‌ ئاماژه‌ی به‌وه‌ كردووه‌ یاریزانه‌ ئارجێنیتیه‌كه‌ ده‌چێته‌ خولی چینی.

له‌لایه‌ن خۆیه‌وه‌ رۆژنامه‌ی سپۆرت ئاشكرای كردووه‌ كۆتینیۆ بۆ یه‌كه‌مجار به‌شداری یارییه‌كی بارسێلۆنا ده‌كات و ئاشكرایكردووه‌ یاریزانه‌ بڕازیلیه‌كه‌ رۆژی پێنجشه‌ممه‌ له‌ یاری گه‌ڕانه‌وه‌ی جامی شای ئیسپانیا به‌رامبه‌ر ئیسپانیۆل یاری ده‌كات، كه‌ له‌ یاری چووندا بارسا دێربی كه‌ته‌لۆنیای به‌ گۆڵێكی بێبه‌رامبه‌ر دۆڕاند و تووشی یه‌كه‌م شكستی ئه‌م وه‌رزه‌ بوون

خاڤێر ماسكیرانۆ له‌وه‌ته‌ی له‌ هاوینی 2010 له‌ یانه‌ی لیڤه‌رپووله‌وه‌ به‌بڕی 23 ملیۆن پاوه‌ند روویكرده‌ یانه‌ی بارسێلۆنا به‌شداریی 333 یاری له‌گه‌ڵ بارسا كردووه‌ و ته‌نیا یه‌ك گۆڵی كردووه‌ و 8 ئاسیستی هه‌بووه‌.