سیاسی

باڵیۆزی سعوودیه‌ له‌ یه‌مه‌ن: حووسییه‌كان ده‌ستیان به‌سه‌ر 19 كه‌شتی نه‌وتدا گرتووه‌

ماوه‌ی زیاتر له‌ 19 رۆژه‌ حووسییه‌كان ئه‌و كه‌شتیانه‌ی كۆنترۆڵ كردووه‌ و ده‌ستیان به‌سه‌ر بار و كاڵاكانیاندا گرتووه‌

ڕۆژهەڵاتی ناوەڕاست

K24- هه‌ولێر:

محه‌مه‌د ئال جابر، باڵیۆزی سعوودیه‌ له‌ یه‌مه‌ن رایگه‌یاند، حووسییه‌كان ده‌ستیان به‌سه‌ر زیاتر له‌ 19 كه‌شتیدا گرتووه‌، كه‌ كاری گواستنه‌وه‌ی نه‌وت و به‌رهه‌مه‌كانی وزه‌ ده‌كه‌ن.

ئال جابر له‌ تویتێكدا له‌ هه‌ژماری تایبه‌تی خۆی له‌ تۆڕی كۆمه‌ڵایه‌تی تویته‌ر نووسیویه‌تی، ناوه‌ندی پشتگیری له‌ پرۆسه‌ مرۆییه‌كان له‌ یه‌مه‌ن نیگه‌رانه‌ له‌ ده‌ستبه‌سه‌رداگرتنی زیاتر له‌ 19 كه‌شتی گواستنه‌وه‌ی نه‌وت له‌لایه‌ن حوسییه‌كانه‌وه‌ له‌ ناوچه‌ی ره‌میول مه‌ختاف و، رێگریكردنیان له‌ چوونیان به‌ره‌و به‌نده‌ری حه‌دیده‌.

باڵیۆزی سعوودیه‌ لیستی ناوی ئه‌و كه‌شتیانه‌شی بڵاوكرده‌وه‌، كه‌ وه‌ك خۆی ئاماژه‌ی پێكرد، زیاتر له‌ 26 رۆژه‌ له‌لایه‌ن حووسییه‌ شیعه‌كانه‌وه‌ ده‌ستیان به‌سه‌ردا گیراوه‌. به‌گوێره‌ی ئه‌و لیسته‌ش كه‌شتییه‌كان ته‌نیا هی وڵاتی سعوودیه‌ نین، به‌ڵكو ژماره‌یه‌كیان هی وڵاتانی دیكه‌ی عه‌ره‌بین.

ئه‌و دیپلۆماتكاره‌ سعوودییه‌ ئاماژه‌ی به‌وه‌شكرد، هاوپه‌یمانی عه‌ره‌بی به‌ سه‌ركردایه‌تی عه‌ره‌بستانی سعوودیه‌ به‌ هه‌موو تواناكانییه‌وه‌ هاوكاری گه‌شیتنی كه‌شتی هاوكاری و پێداویستی مرۆیی و بازرگانی بۆ به‌نده‌ره‌كانی یه‌مه‌ن ده‌كات و، له‌پێناو نه‌هێشتنی نه‌هامه‌تییه‌كانی خه‌ڵكی یه‌مه‌ن، به‌ به‌رده‌وامی هه‌ماهه‌نگی له‌گه‌ڵ نه‌ته‌وه‌ یه‌كگرتووه‌كان ده‌كات، له‌وانه‌ش ئه‌و 19 كه‌شتیانه‌ن كه‌ ئێستا له‌ لایه‌ن حووسییه‌كانه‌وه‌ ده‌ستیان به‌سه‌ردا گیراوه‌ و رێگه‌یان پێ نادرێت بگه‌نه‌ به‌نده‌ری حه‌دیده‌.

هه‌ر له‌مباره‌یه‌وه‌، ناوه‌ندی پشتگیریكردن له‌ پرۆسه‌ مرۆییه‌كان له‌ یه‌مه‌ن خشته‌یه‌كی تێر و ته‌سه‌لی كه‌شتییه‌كان و مێژووی گه‌یشتنیان بڵاوكردۆته‌وه‌، وێڕای ئاشكراكردنی ماوه‌ی ده‌ستبه‌سه‌رداگرتن و كۆنترۆڵكردنی بار و كاڵاكانی ناو ئه‌و كه‌شتیانه‌ له‌لایه‌ن چه‌كدارانی حوسییه‌وه‌.

ئه‌مه‌ش له‌كاتێكدایه‌، ئێواره‌ی ئه‌مڕۆ چه‌كدارانی حوسی چه‌ند مووشه‌كێكیان ئاراسته‌ی وڵاتی سعوودیه‌ كرد، به‌بێ ئه‌وه‌ی هیچ  زه‌ره‌ر و زیانێك له‌باره‌ی ئه‌و بۆردومانه‌وه‌ بڵاوبكرێته‌وه‌.

H.B

کوردستان24 دیجیتاڵ میدیا ,