رۆما هاوشێوه‌ی چامپیۆنزلیگ دیسان ریمۆناتادای به‌سه‌ر بارسێلۆنا كرد

لە جامی نێو دەوڵەتی پاڵەوانان بارسێلۆنا رووبەروو رۆما بووەوەو جارێكی دیكە نەیتوانی لەگورگەكان ببەنەوە و بە 4 گۆڵ بەرامبەر 2 گۆڵ دۆران، ماڵكۆم كە نزیك بوو پەیوەندی بە رۆما بكات، لەم یاریە گۆڵێكی له‌ رۆما كرد.

لە یاریگای لینگستۆن و لەویلایەتی تكساس، لەجامی نێودەوڵەتی پاڵەوانان، بارسێلۆنای ئیسپانی و رۆمای ئیتاڵی رووبەروو بوونەوە.

بارسا لەژێر سەركردایەتی ڤاڵڤێردی بەبێ ئامادەبوونی مێسی و سوارێز یارییەكەی ئەنجامدا.

لەخولەكی 7 و لەسەره‌تای نیوەی یەكەم، رافینیا ئالكانتارا گۆڵی پێشكەوتنی بارسای كرد، بەڵام ھەر لەم گێمە و لە كرۆسێكی كلۆیڤێرتی بچووك ستیڤان شەعراوی ئەنجامەكەی یەكسانكردەوە.

لەگەل دەستپێكردنەوەی نیوەی دووەم، ماڵكۆم ئەو یاریزانەی خەریك بوو ببێتە یاریزانی رۆما، لە یانە ئیتاڵیاییەكە ھەڵگەرایەوە و گۆڵی دووەمی بۆ بارسێلۆناكرد.

تەنیا 12 خولەك لەكاتی یارییەكە مابوو، گورگەكانی رۆما، ھاوشێوەی یاری چامپیۆنزلیگ، لە بارسێلۆنا ھاتنەوە دەنگ و 3 گۆڵیان لەم كاتە تۆمار كرد.

لەخولەكی 78 فلۆرێنزی ئەنجامەكەی یەكسان كردەوە، بریان كریستانتی لەخولەكی 83 ناوی خۆی لە لیستی گۆڵكارانی یارییەكە نووسیەوە یانەكەی كردە خاون 3 گۆڵ؛ سێ خولەك دواتر، دیێگۆ پیرۆتی گۆڵی چوارەم و دڵنیایی كردو بە چوار گۆڵ بەرامبەر دوو گۆڵ لە بارسێلۆنایان بردەوە.

راهێنه‌ری بارسێلۆنا دوای شكسته‌كه‌ چی گوت؟

ڤاڵڤێردی راهێنه‌ری بارسێلۆنا دوای یارییه‌كه‌ له‌ پرێس كۆنفرانسێكدا گوتی: 75 خولەك باشترین ئاستمان پێشكەشكرد، بەڵام لە ماوەی دواتر 3 گۆڵمان لێ تۆمار كرا،  ھەوڵدەدەین ھەڵەكانمان چارەسەر بكەین و یاریزانەكانیشم ئاستێكی باشیان پێشكەشكردو بۆ وەرزی داھاتوو ئومێدم پێیان ھەیە .

ڤاڵڤێردی ده‌شڵێت: رۆما یانەیەكی بەھێزەو كۆمەڵێك یاریزانی لاو یارییان كردو ئاستێكی باشیان پێشكەش كرد،ئەمەش دڵخۆشم دەكات، راستە ئەمە یاری فەرمی نییە، بەڵام دەبێ لێكۆڵینەوە لە ئەنجامەكەی بكەین و خاڵی بەھێز و لاواز دەستنیشان بكەین.