راهێنه‌ری هه‌ڵبژارده‌ی كرواتیا: مۆدریچ ئاستی ناگاته‌ مێسی

سلاڤین بیلیچ كه‌ پێشتر له‌ نێوان ساڵانی 2006 تا 2012 راهێنه‌ری هه‌ڵبژارده‌ی كرواتیا بووه‌ له‌ باره‌ی خه‌ڵاتی (زه‌ بێست) رایگه‌یاند كه‌ لیۆنێل مێسی شایسته‌ی هه‌موو خه‌ڵاتێكه‌ و هیچ یاریزانێك به‌ مۆدریچیشه‌وه‌ ئاستی ناگاته‌ مێسی.

سلاڤین بیلیچ دوای ئه‌وه‌ی هاوینی رابردوو له‌ پۆستی راهێنه‌رایه‌تی یانه‌ی وێستهام یونایتد دوورخرایه‌وه‌، شه‌وی رابردوو له‌ نیویۆرك له‌گه‌ڵ شاندێكی یانه‌ی ئیتیحادی سعوودیه‌ كۆبووه‌وه‌ و به‌ فه‌رمی وه‌ك راهێنه‌ری ئه‌و یانه‌یه سعوودییه‌‌ ده‌ستنیشان كرا.

بیلیچ له‌ لێدوانێكدا كه‌ له‌ پێگه‌ی سكای سپۆرتسی بریتانیا بڵاو بۆته‌وه‌ گوتی: زۆر خۆشحاڵبووم كه‌ لوكا مۆدریچ خه‌ڵاتی باشترین یاریزانی 2018ـی برده‌وه‌، به‌ڵام له‌گه‌ڵ ئه‌وه‌شدا هیچ یاریزانێك ئاستی ناگاته‌ لیۆنێل مێسی.

لوكا مۆدریچ دوای 10 ساڵ كۆتایی به‌ قۆرخكاری لیۆنێل مێسی و كریستیانۆ رۆناڵدۆ هێنا و به‌ فه‌رمی بۆ یه‌كه‌مجار خه‌ڵاتی باشترین یاریزانی جیهانی برده‌وه‌.