جۆرج بوشی باوك كۆچی دواییكرد

K24 - ھەولێر

جۆرج بوشی باوك سەرۆكی پێشووتری ئەمەریكا لە تەمەنی 94 ساڵی كۆچی دواییكرد.

لە راگەیندراوێکدا، جۆرج دەبلیو بوش، کۆچی دوایی بوشی باوکی راگەیاند و نووسیویەتی: "دوای 94 ساڵی پرشنگدار، بەناوی جیب، نێیل، مارڤین و دۆرۆ رایدەگەیەنم کە باوکمان کۆچی دوایی کرد".

جۆرج هۆربێرت وۆڵکەر بوش، لە ساڵی 1924 لە ویلایەتی ماساچوسێتسی ئەمەریکا لەدایکبووە و ساڵی 1989 بۆ 1993، 41هەمین سەرۆکی ئەمەریکا بووە.

وەک ئەندامێکی پارتی کۆمارییەکان، کاری سیاسی و سەربازیی وەک ئەندام کۆنگرێس، باڵیۆز و بەڕێوەبەری هەواڵگیری کردووە.

لەساڵی 1990 و لە دوای داگیرکردنی کوەیت لەلایەن سەددام حوسەینەوە، بوشی باوک سەرکردایەتی هێزێکی هاوپەیمانی نێودەڵەتی کرد بۆ وەدەرنانی سوپای عێراق لە کوەیت و تیایدا سەرکەوتوو بوو.

جۆرج دەبلیو بوشی کوڕیشی لە ساڵانی 2001 بۆ 2009 سەرۆکی ئەمەریکا بووە. بە هێرشکردنە سەر عێراق و لەناوبردنی رژێمی سەددام حوسەین، کاریگەری زۆری لەسەر عێراق، کوردستان و تەواوی رۆژهەڵاتی ناوەڕاست دروستکرد.