ناوەڕۆکی کۆبوونەوەی ئەنجوومەنی سەرکردایەتی پارتی ئاشکرا دەکرێت

K24 – هه‌ولێر:

ئەمڕۆ یەکشەممە 10/03/2019 ئەنجوومەنی سەرکردایەتی پارتی دیموکراتی کوردستان کۆبووەوە و لە دوای کۆبوونەوەکە وتەبێژی پارتی  کۆنگرەیەکی رۆژنامەوانی ئەنجامدا.

مەحمود محەمەد، وتەبێژی پارتی دیموکراتی کوردستان رایگەیاند: "پارتی سەردانی تەواوی لایەنەکان دەکات و دەبێت هەموو لایەنەکان  پێکەوە هەوڵی چارەسەرکردنی کێشەکان بدەن".

لەبارەی کۆبوونەوەی پارتی و یەکێتی، گووتی: "چاوەڕێین یەکێتی کاندیدەکانی بۆ پەرلەمان یەکلا بکاتەوە و تاکو ئێستاش لەگەڵ یەکێتی باسمان لە دابەشکردنی پۆستەکان نەکردووە".

لە وەڵامی پرسیاری پەیامنێری كوردستان24 لەبارەی دیاریكردنی پارێزگاری كەركووك مەحموود محەمەد گووتی: "ئەو بابەتە لە كۆبوونەوەی نێوان سەرۆك بارزانی و كۆسرەت رەسوڵ باسكراوە و دەگەڕێتەوە سەر رێككەوتن لەسەری".

لە بارەی پەیوەندی هەرێمی کوردستان و بەغدا، ئاشکرایکرد: "پێشڤەچوون لە پەیوەندییەکانی نێوان هەولێر و بەغدا هەیە".

هەر بەگوێرەی کۆنگرە رۆژنامەوانییەکەی مەحمود محەمەد،  پارتی دەیەوێت حکوومەتێکی بەهێز و زۆرینە پێکبهێنێت و بۆ ئەوەش ئەمڕۆ باسی لە پێکهێنانی حکوومەتی هەرێم و پەیوەندییەکانی هەولێر و بەغدا، نێوانی لایەنە کوردستانییەکان کردووە.

زیاتر لە پێنج مانگە هەڵبژاردنی پەرلەمانی کوردستان کراوە، بەڵام تاکو ئێستا حکوومەت پێکنەهاتووە، ئەوە جێگای گەشبینی هاووڵاتیانیشە، رێککەوتنی پارتییە لەگەڵ یەکێتی و بزووتنەوەی گۆڕان لەبارەی پێکهێنانی حکوومەتی هەرێمی کوردستان.

H.J