بە فەرمانی سەرۆك بارزانی پارتی ھەموو جۆرە گوتار و نوسینێکی گرژ رادەگرێت

K24 - ھەولێر

لە راگەیەندراوێكدا لە بارەی بارودۆخی ئێستای ھەرێمی كوردستان، گوتەبێژی پارتی رایدەگەیەنێت: "لەپێناو بەرژەوەندیی گشتی و لەسەر فه‌رمانی جەنابی سەرۆک مەسعود بارزانی، بۆ خزمەتی پرۆسەی سیاسی و هەرێمەکەمان، هه‌روه‌ها بۆ رەواندنەوەی دڵەڕاوکێ و نیگەرانیی هاووڵاتیانی خۆشەویست، لەم بەرە بەرەی جەژنی پیرۆزی رەمەزانەدا، هەموو جۆرە گوتار و نووسینێکی گرژ، کە پێی دەگوترێ هێرشی راگەیاندن، لە تەواوی دامودەزگاکانی پارتیمان یەک لایەنانە لە ئەمڕۆوە (۳ی٦ی۲٠۱۹) وە رادەگیرێ".

لەو راگەیەندراوەدا مەحموود محەممەد، گوتەبێژی پارتیی دیموکراتی كوردستان ئاماژە بۆ ئەوە دەكات: "ئەم بارودۆخە هەستیارەی ناوچەکە و عێراق بە گشتی و کوردستان بە تایبەتی، کەشێکی ئارام و تەحەمول و لە خۆبووردوویی زیاترمان لێ دەخوازێ. بەداخەوە لە ئاکامی گوتار و نووسینی پێشتری چەند کەسێکی باڵا دەست و بەشێک لە راگەیاندنەکانی یەكێتیی نیشتمانیی کوردستان کە بە زمانی زبر و دوور لە ئەتەکێتی سیاسی و راگەیاندن، هێرشیان کردە سەر کەسایەتی و پارتیشمان، گرژی لە راگەیاندنەکانەوە دروست بوو".

دەقی راگەیەندراوكەی گوتەبێژی پارتی 

ئەم بارودۆخە هەستیارەی ناوچەکە و عێراق بەگشتی و، کوردستان بە تایبەتی، کەشێکی ئارام و تەحەمول و لەخۆبردوویی زیاترمان لێ دەخوازێ. بەداخەوە لە ئاکامی گوتار و نووسینی پێشتری چەند کەسێکی باڵا دەست و بەشێک لە راگەیاندنەکانی یەكێتی نیشتمانی کوردستان کە بە زمانی زبر و دوور لە ئەتەکێتی سیاسی و راگەیاندن هێرشیان کردە سەر کەسایەتی و پارتیشمان، گرژی لە راگەیاندنەکانەوە دروست بوو.

لەپێناو بەرژەوەندی گشتی و لەسەر ئەمری جەنابی سەرۆک مەسعود بارزانی، بۆ خزمەتی پرۆسەی سیاسی و هەرێمەکەمان و، بۆ رەواندنەوەی دڵەڕاوکێ و نیگەرانی هاووڵاتیانی خۆشەویست، لەم بەرە بەرەی جەژنی پیرۆزی رەمەزانەدا، هەموو جۆرە گوتار و نوسینێکی گرژ، کە پێی دەگوترێ هێرشی راگەیاندن لە تەواوی دامودەزگاکانی پارتیمان یەک لایەنانە لە ئەمڕۆوە (۳ی٦ی۲٠۱۹) وە رادەگیرێ.

مەحمود محەمەد

گوتەبێژی پارتی دیموکراتی کوردستان

٣ی٦ی٢٠١٩