رێوڕەسمی جەژن لە ھەرێمی كوردستان بەڕێوە دەچێت

K24 - ھەولێر

ئەمڕۆ 4/6/2019، یەكەم رۆژی جەژنی رەمەزانە لە ھەرێمی كوردستان و عێراق و ژمارەیەك وڵاتی ئیسلامی، لە شار و شارۆچكەكانی ھەرێمی كوردستانیش وەك دابونەریتی ئایینی و كۆمەڵایەتی، رێوڕەسمی جەژن بەڕێوە دەچێت.

رێوڕەسمی جەژن لە سەرەتادا لە مزگەوتەكان و بە ئەنجامدانی نوێژ و وتار خوێندنەوە و نزاكردن دەست پێ دەكات، دوای ئەوەی ئامادەبووانی جەژن گەردن ئازادی لە یەكتر دەكەن و بەرەو ماڵەوە دەگەڕێنەوە. سەردانی كەسوكار و ماڵی دراوسێكانیان دەكەن، لەگەڵ پیرۆزكردنی جەژن لە یەكتر، نوقڵ و شیرینی لە ماڵ و شوێنە گشتییەكان دابەش دەكرێت. وەك دابونەریتێكی كۆمەڵایەتی، خەڵكی رۆژی پێش جەژن، یان بەیانیی یەكەم رۆژی جەژن، سەردانی گۆڕی كەسوكاریان دەكەن.

لە نێو كۆمەڵگەی كوردەواریدا و لە زۆربەی بۆنەكاندا، خواردن و چێشتی تایبەت ئامادە دەكرێت، لە جەژنی رەمەزانیش دوای مانگێك بەرۆژوو بوون، خەڵكی نیوەڕۆی یەكەم رۆژی جەژن و رۆژی دواتر، خوانی تایبەت دەڕازێننەوە.

لە جەژن و بۆنەكاندا ناوچە گەشتیارییەكان پشكی شێریان بەردەكەوێت، بەتایبەتی ئەو جەژن و بۆنانەی دەكەونە وەرزەكانی بەھار و ھاوین. بە گوێرەی تۆڕی پەیامنێرانی كوردستان24 لە ناوچە گەشتیارییەكانی ھەرێمی كوردستان، ئامادەكاریی بۆ پێشوازیكردن لە گەشتیاران كراوە و پێشبینی دەكرێت رێژەیەكی بەرچاو لە گەشتیاران لە شارەكانی كوردستان و عێراق و وڵاتانی دراوسێ، روو لە ناوچە گەشتیارییەكانی ھەرێمی كوردستان بكەن.

ھ.م