مەسرور بارزانی لەگەڵ پێکهاتەکانی کوردستان کۆدەبێتەوە

K24 – هه‌ولێر:

سەرچاوەیەک لە نووسینگەی مەسرور بارزانی، راسپێردراو بۆ پێکهێنانی کابینەی نۆیەمی حکومەتی هەرێمی کوردستان بە کوردستان24ی راگەیاند، ئەمڕۆ 22/06/2019 مەسرور بارزانی لە شاری هەولێر لەگەڵ پێکهاتەکان کۆدەبێتەوە.

سەرچاوەکە گوتیشی: "مەسرور بارزانی پێشنیوەڕۆی ئەمڕۆ لەگەڵ چەند لایەنێکی تورکمانی کۆدەبێتەوە و دواتر لەگەڵ بەرەی تورکمانی کۆدەبێتەوە، پاشان لەگەڵ رۆمیۆ هەکاری، سکرتێری گشتی پارتی دیموکراتی بێت نەهرێن و شاندێکی ئەو حزبە کۆدەبێتەوە".

ئەو سەرچاوەیە ئەوەشی ئاشکرا کردووە، دوانیوەڕۆی ئەمڕۆ مەسرور بارزانی لەگەڵ بزووتنەوەی ئاشووری و دواتر لەگەڵ ئەنجوومەنی گەلی کلدانی ئاشووری کۆدەبێتەوە و تەوەری سەرەکی کۆبوونەوەکانیشی، بەشداریکردنی پێکهاتەکان لە کابینەی نۆیەمی حکومەتی هەرێمی کوردستان و وەرگرتنی سیڤی کاندیدان دەبێت بۆ پۆستە وزارییەکان.

رۆژی 17/06/2019، مەسرور بارزانی، لەشاری سلێمانی بە جیا لەگەڵ یەکێتی نیشتمانی کوردستان و بزووتنەوەی گۆڕان و حزبی سۆسیالیست دیموکراتی کوردستان کۆبووەوە و بڕیاریشە کۆبوونەوەی لەگەڵ لایەنەکان بۆ پێکهێنانی حکوومەتی نوێی هەرێمی کوردستان بەردەوام بێت.

H.J