شێخ جەعفەر: پەکەکە رەچاوی دۆخی هەرێمی کوردستان ناکات

K24 – هه‌ولێر:

لە لێدوانێکی تایبەتدا بۆ کوردستان24، شێخ جەعفەر مستەفا، فەرماندەی هێزەکانی 70ی پێشمەرگە رایگەیاند، هێزەکانی پەکەکە رەچاوی یاسا و رێنماییەکانی هەرێمی کوردستانیان نەکردووە و بیانویان بە تورکیا داوە هێرشبکەنە سەر ناوچە سنوورییەکان.

شێخ جەعفەر، کە لە لایەن پارتەکەی بۆ پۆستی جێگری سەرۆکی هەرێم کاندید کراوە، لەبارەی تۆمەتبارکردنی پارتی و یەکێتی بەهاوکریکردنی تورکیا لەلایەن پەکەکەوە گووتی: " ئێمە چیدیکە لە شاخ نین و خاوەنی حکوومەت، پەرلەمان، کیان و سەرۆکایەتیی هەرێمین و دەبێت لەو چوارچێوەیە مامەڵە بکەین. ئەو تۆمەتانەش بە تەواوی رەتدەکەینەوە".

ئاماژەی بەوەشدا، هێزەکانی پەکەکە رەچاوی ژیانی گوندنشینانی ناوچە سنوورییەکانیان نەکردووە و بیانوویان داوەتە سوپای تورکیا سەدان خەڵک ئاوارە بکەن.

لەبارەی پێکهێنانی کابینەی داهاتووش، شێخ جەعفەر بۆ کوردستان24ی ئاشکرا کرد، یەکێتی کاندیدەکانی یەکلا کردۆتەوە و رادەستی مەسرور بارزانی، راسپێردراو بۆ پێکهێنانی کابینەی نۆیەمی حکوومەت دەکات.

ئەو بەرپرسەی یەکێتی لەسەر دۆخی کەرکووکیش دوا و گووتی، پارتی و یەکێتی پێکەوە کەرکووک بەڕێوەدەبەن و هەوڵدەدەن یەکڕیزی و یەکێتیی بۆ شاری کەرکووک بگەڕێنەوە.

بەگوێرەی گووتەکانی شێخ جەعفەر و زانیارییەکانی کوردستان24، کاندیدانی یەکێتی بۆ پۆستە وەزارییەکان بەمجۆرە دەبێت:

رێواز فایەق - سەرۆکی پەرلەمان

قوباد تاڵەبانی - جێگری سەرۆکی حکومەت

جەعفەر مستەفا - جێگری سەرۆکی هەرێم

شۆرش ئیسماعیل - وەزیری پێشمەرگە

بێگەرد تاڵەبانی - وەزیری كشتوكاڵ

دەرباز كۆسرەت رەسول - وەزیری پلاندانان

خالید شوانی - وەزیری پەیوەندییەكانی نێوان هەرێم و بەغدا

حەمەی حەمەسەعید - وەزیری رۆشنبیری

ئارام حەمەی مینا - خوێندنی باڵا

رەوەند مەلا مەحمود - دەستەی ناوچە كوردستانییەكانی دەرەوەی ئیدارەی هەرێم

عوسمان شوانی - دەستەی گەشتوگوزار

ئیسماعیل مەحمود - دەستەی گشتی كاروباری مین

H.J