سهرۆکی ههرێمی کوردستان پیرۆزبایی له میری ئێزدییان دهکات
نێچیرڤان بارزانی پەیامێک ئاراستەی میری ئێزدییان دەکات
K24 – ههولێر:
نێچیرڤان بارزانی، سەرۆکی هەرێمی کوردستان، پیرۆزبایی لە میر حازم تەحسین بەگ بە بۆنەی هەڵبژاردنی وەک میری ئێزدییەکان کرد.
نێچیرڤان بارزانی لە پەیامەکەیدا دەڵێت: "دەبێت هەموو پێکەوە کار بکەین تاکو بارگرانی سەر شانی ئێزدییەکان کەم بکەینەوە".
سەرۆکی هەرێمی کوردستان سووربوونی خۆی بۆ هاوکاریکردنی ئێزدییەکان دووپات دەکاتەوە و داوای پێکەوە کارکردنی زیاتر لەگەڵ میری ئێزدییەکان بۆ گەڕانەوە ئاوارەکان و دۆزینەوە رفێنراوە ئێزدییەکان دەکات.
ئەمڕۆ شهممه 27/7/2019، لە پەرستگای لالش له قهزای شێخان له رێوڕەسمێکدا حازم میر تهحسین بهگ، وهك میری نوێی ئێزدییهكان و سهرۆكی ئهنجوومهنی رۆحانی ئێزدییهكان دهستنیشان كرا و سوێندی ئایینی خوارد.
دەقی پەیامەکەی سەرۆکی هەرێمی کوردستان بۆ میری ئێزدییان
ڕێزدار مير حازم تهحسين بهگ،
ميرێ ئێزدييان
سلاڤ و ڕێز..
ب ههلكهفتنا دهستنيشانكرنا ههوه وهك ميرێ ئێزدييان، ب گهرمى پيرۆزباهيێ ل ههوه و ههمى ئێزدييان دكهم، هيڤييا سهركهفتنێ د ئهرك و بهرپرسيارييا ههوهيا نوودا بۆ ههوه دخوازم.
هوين د دهمهكێده ڤێ ئهرك و بهرپرسيارييا مهزن ههلدگرن كو هێشتا ههژمارهكا مهزنا خوشك و برايێن مه يێن ئێزدى د كهمپێن ئاوارهييێدا دژين و نكارن ڤهگهرنه سهر جهـ و وارێن خۆ. ئهرك و بهرپرسيارييا ههوه يا گرانه و ئهم ههموو پێكڤه ههوجهى ههڤكارييا ههڤدونه داكو بكارين هندهكێ ژ بارێ گرانێ ئێزدييان سڤك بكهين.
ههوه پشتڕاست دكهم كو وهك ههردهم ئهم دێ ههموو ههولا دهين داكو ب ههر ئاوايهكێ بكارين پشتهڤان بين و هاريكارييا خوشك و برايێن خۆ يێن ئێزدى بكهين. هندى ئێزدييهك ب تنێ ژى ل ههر دهرهكێ ڕهڤاندى مابيت، چ پێويسته ئهم دێ كهين بۆ ڤهگهڕاندنا وان، ههروهسا دێ ههموو ههولا دهين بۆ ئاڤهدانكرن و ڤهگهڕاندنا ژيانێ بۆ دهڤهرێن ئێزدييان داكو بكارن ب سهرفرازى ڤهگهڕنه سهر جهـ و وارێن خۆ.
جارهكا دى ژى ههوهيێن ڕێزدار و ههموو خوشك و برايێن ئێزدى و پێكهاتێن ئۆلى و نهتهوهيى پشتڕاست دكهين كو ههرێما كوردستان دێ ههر مينيت وارێ پێكڤهژيانێ، پڕڕهنگيێ، ئاشتيێ و ههڤدوقهبوولكرنێ بۆ ههموويان.
دوباره ميراتييا ههوه پيرۆز بيت، ههر سهركهفتى بن.
نێچيرڤان بارزانى
سهرۆكێ ههرێما كوردستانێ
27/7/2019
H.J