زێدان: زوو بڕیار مه‌ده‌ن وه‌رزێكی باش چاوه‌ڕێمانه‌

دوای سه‌ركه‌وتنه‌كه‌ی ریال مه‌درید له‌ دژی فێنه‌رباهچه‌ له‌ جامی دۆستانه‌ی ئاودی، زینه‌دین زێدان ئاماژه‌ی بۆ ئه‌وه‌ كرد كه‌ وه‌رزێكی باش و پڕ سه‌ركه‌وتن چاوه‌ڕێیان ده‌كات، ده‌شڵێت: تكایه‌ پرسیارم له‌ باره‌ی گاریس به‌یل لێ مه‌كه‌ن و سه‌رقاڵم مه‌كه‌ن.

ریال مه‌درید له‌ دوایین یاری دۆستانه‌ و ئاماده‌كاری 5 ـ 3 گۆڵ له‌ فێنه‌رباهچه‌ی توركیای برده‌وه‌، راسته‌وخۆ دوای یارییه‌كه‌ له‌ پرێس كۆنفرانسێك زینه‌دین زێدان جه‌ختی له‌وه‌ كرده‌وه‌ كێشه‌ی گۆڵكردنیان چاره‌سه‌ر ده‌كات و ده‌شڵێت: راسته‌ 3 گۆڵمان لێكرا، به‌ڵام ئێمه‌ش 5 جار تۆڕی به‌رامبه‌رمان هه‌ژاند و ده‌مانتوانی گۆڵی زیاتریش بكه‌ین.

زێدان گوتیشی: پێموایه‌ ئه‌م وه‌رزه‌ ئه‌نجام و سه‌ركه‌تنی باش چاوه‌ڕێمان ده‌كات و ئاماده‌كارییه‌كی باشمان بۆ وه‌رزی نوێ كردووه‌.

زیزۆ له‌ به‌رسیڤێكی رۆژنامه‌نووساندا ده‌ڵێت: راسته‌ له‌ یارییه‌ ئاماده‌كارییه‌كان به‌ پێكهاته‌ و شێوازی یاریكردنی جیاواز ده‌ركه‌وتووین و له‌ یارییه‌كانیش ئیسكۆ و هازارد به‌ سه‌ربه‌ستی یارییان پێكراوه‌، ده‌بێت یاری له‌ دوای یاری گۆڕانكاری بكه‌ین بۆ ئه‌وه‌ی به‌ باشترین شێوه‌ خۆمان ئاماده‌ بكه‌ین.

زێدان دڵخۆشی خۆی به‌ به‌شداریكردنی لۆنینی گۆڵپارێز ده‌ربڕی، له‌مباره‌یه‌وه‌ گوتی: لۆنین داهاتووی ئێمه‌یه‌، بیرۆكه‌ی ئه‌وه‌شم هه‌یه‌ كۆبۆی ژاپۆتی له‌گه‌ڵ تیپی كاستیا یاری بكات و له‌گه‌ڵ ئێمه‌ش راهێنان بكات، چونكه‌ ئه‌و هاوشێوه‌ی رۆدریگۆ و ڤینیسیۆس 3 گه‌نجی تایبه‌تن و پێویسته‌ به‌ ئارامی كاریان له‌سه‌ر بكرێت.

له‌ باره‌ی بڵاوبوونه‌وه‌ی وێنه‌كانی گاریس به‌یل و یاری گۆڵف؟ راهێنه‌ری ریال مه‌درید گوتی: نازانم، ئێوه‌ قسه‌ له‌سه‌ر بابه‌تێك ده‌كه‌ن په‌یوه‌ندی به‌ منه‌وه‌ نییه‌، نامه‌وێت سه‌رقاڵ بم به‌  وه‌ڵامدانه‌وه‌ی ئه‌م پرسیارانه‌، چونكه‌ من ئێستا خه‌ریكی ئاماده‌كاری تیپه‌كه‌م و هیوادارم گاریس به‌یل به‌ باشی مه‌شقه‌كانی كرد بێت.

زیزۆ له‌ به‌رسیڤێكی دیكه‌ له‌ باره‌ی ماریانۆ و بازاری گواستنه‌وه‌ی یاریزانان، ئاماژه‌ی بۆ ئه‌وه‌ كرد كه‌ تا 31/8 هه‌موو ئه‌گه‌ره‌كان كراوه‌ن، ره‌نگه‌ یاریزان بڕوات و یاریزانی نوێش بێت، جارێ نازانم، تا نه‌گه‌ڕێمه‌وه‌ مه‌درید هیچ شتێك روون نییه‌.