ناوه‌ڕۆكی رێككه‌وتنه‌كه‌ی نێوان واشنتن و ئه‌نقه‌ره‌

K24- هه‌ولێر:

مایك پێنس، جێگری سه‌رۆكی ئه‌مه‌ریكا رایگه‌یاند، له‌گه‌ڵ توركیا گه‌یشتنه‌ رێككه‌وتن له‌سه‌ر وه‌ستاندنی كرده‌ سه‌ربازییه‌كه‌ی توركیا له‌ باكووری رۆژهه‌ڵاتی سووریا و خاڵه‌كانی ناو رێككه‌وتنه‌كه‌شی ئاشكرا كرد، به‌ڵام توركیاش ناوه‌ڕۆكی رێككه‌وتنه‌كه‌ی به‌ شێوازێكی جیاوازتر بڵاو كردووه‌ته‌وه‌.

خاڵه‌كانی رێككه‌وتنه‌كه‌، كه‌ له‌لایه‌ن ئه‌مه‌ریكاوه‌ بڵاوكراوه‌ته‌وه‌:

1- توركیا ئۆپه‌راسیۆنه‌ سه‌ربازییه‌كه‌ی ده‌وه‌ستێنێت، بۆ ئه‌وه‌ی رێگه‌ به‌ یه‌كینه‌كانی پاراستنی گه‌ل یه‌په‌گه‌ بدات له‌ماوه‌ی 120 كاتژمێردا هێزه‌كانی به‌ قووڵایی 32 كیلۆمه‌تر له‌ نزیك سنووری توركیا بكشێنێته‌وه.

2- ئه‌مه‌ریكا هه‌ماهه‌نگی له‌گه‌ڵ یه‌په‌گه‌ ده‌كات، بۆ ئه‌وه‌ی ده‌سته‌به‌ری ئاسایشی كشانه‌وه‌ی هێزه‌كانی به‌ قووڵایی 32 كیلۆمه‌تر له‌ نزیك سنووری نێوان سووریا و توركیا ‌بكات.

3- رێككه‌وتنه‌كه‌ رێگری له‌ ئه‌نجامدانی ئۆپه‌راسیۆنی سه‌ربازی له‌ شاری كۆبانێ ده‌كات، كه‌ هێزه‌كانی سوپای سووریا چوونه‌ته‌ ناو ئه‌و شاره‌.

4- دوای كشانه‌وه‌ی یه‌كجاره‌كیی هێزه‌ كوردییه‌كان، كۆتایی به‌ ئۆپه‌راسیۆنه‌ سه‌ربازییه‌كه‌ی توركیا ده‌هێندرێت.

5- ئه‌مه‌ریكا هیچ سه‌ربازێكی له‌ناو خاكی سووریا نابێت.

6- ئه‌مه‌ریكا و توركیا پابه‌ندن به‌ رێككه‌وتنی ئاشتیانه‌ له‌باره‌ی ناوچه‌ی ئارام له‌ سووریا، به‌ شێوه‌یه‌ك كه‌ ئاسایشی ئه‌نقه‌ره‌ و كورده‌كان له‌خۆ بگرێت.

7- پاراستنی پێكهاته‌ نه‌ته‌وه‌یی و ئاینییه‌كان و پارێزگاریكردن له‌ گرتووخانه‌كانی ناوچه‌ی ئارام.

8- شكستپێهێنانی رێكخراوی داعش ئامانجی هاوبه‌شه‌.

9- ئه‌مه‌ریكا سزای زیاتر به‌سه‌ر توركیادا ناسه‌پێنێت.

ئه‌مه‌ له‌كاتێكدایه‌، مه‌ولود چاویش ئۆغلۆ چه‌ند خاڵێكی دیكه‌ی ناوه‌ڕۆكی رێككه‌وتنه‌كه‌ی خستووه‌ته‌ڕوو.

خاڵه‌كانی رێككه‌وتنه‌كه‌، كه‌ له‌لایه‌ن توركیاوه‌ راگه‌یه‌ندراون:

1- ناوچه‌ی ئارام تا قووڵایی 32 كیلۆمه‌تر و درێژاییه‌كه‌شی له‌ رۆژهه‌ڵاتی فوراته‌وه‌ تا سنووری عێراق ده‌گرێته‌وه‌.

2- گفتوگۆی نێوان توركیا و رووسیا له‌باره‌ی دۆخی منبج و ناوچه‌كانی دیكه‌.

3-  وه‌ستاندنی ئۆپه‌راسیۆنی سه‌ربازی ئامانجه‌كه‌ی ته‌نیا بۆ رێگه‌پێدانه‌ به‌ هێزه‌ كوردییه‌كان بۆ ئه‌وه‌ی ناوچه‌ی ئارام جێبهێڵن.

4- پێویسته‌ هێزه‌ كوردییه‌كان چه‌كه‌ قورسه‌كانیان راده‌ستی سوپای ئه‌مه‌ریكا بكاته‌وه‌.

5- ناوچه‌ی ئارام له‌لایه‌ن توركیاوه‌ كۆنترۆڵ ده‌كرێت.

له‌مباره‌شه‌وه‌ مایك پێنس، جێگری سه‌رۆكی ئه‌مه‌ریكا رایگه‌یاند، "ئه‌وه‌ی له‌سه‌ری رێككه‌وتوون، خزمه‌تی به‌رژه‌وه‌ندی كورد له‌ سووریا ده‌كات و ناوچه‌یه‌كی ئارامی درێژ درووست ده‌كات".

هاوكات مایك پۆمپێیۆ، وه‌زیری ده‌ره‌وه‌ی ئه‌مه‌ریكاش گوتی: "رێككه‌وتنه‌كه‌یان له‌گه‌ڵ توركیا ئه‌ركه‌وتنێكی گه‌وره‌ بوو و ژیانی ملیۆنه‌ها كه‌س رزگار ده‌كات".

H.B