دوو کۆڵبەری کورد بەتەقەی ڕاستەوخۆی پاسداران برینداربوون

K24 - سۆران:

ژمارەیەك کۆڵبەری رۆژهەڵاتی کوردستان لەکاتی گەڕانەوەیاندا بۆ ڕۆژهەڵات، لەسه‌ر سنوور کەوتنە بۆسەی هێزێکی سوپای پاسداران و دوو لە کۆڵبەرەکان برینداربوون.

شایه‌تحاڵێك به‌ناوی ئیبراهیم حەمدان دانیشتووی شارەدێی حاجی ئۆمەران بەکوردستان24ی راگەیاند ئەو کۆڵبەرانە خەڵکی رۆژهەڵاتی کوردستانن و لە کوێستانی (شاخەرووخاو) لە دیوی رۆژهەڵاتی کوردستان کەوتوونەتە بۆسەی سوپای پاسداران.

هاووڵاتیەکیش بەناوی (ئالان ئەکرەم) بەکوردستان24ی راگەیاند، كه‌ به‌ ئۆتۆمبێله‌كه‌ی خۆی هەردوو بریندارەکە ده‌گه‌یه‌نێته‌ نەخۆشخانەی حاجی ئۆمەران و ئێستا به‌ڕێگه‌وه‌ن بۆ نه‌خۆشخانه‌.

گووتیشی: "یەکێك لە بریندارەکان ناوی بەهمەنە و خەڵکی پیرانشارە و فیشەک بەر قاچی کەوتووە، ئەوەی دیکەشیان ناوی خالیدە و خەڵکی مهابادە، فیشەکێك بەر پشتی کەوتووە و باری تەندروستی باش نییە".

ئه‌و هاووڵاتییه‌ ئه‌وه‌شی راگه‌یاند، كه‌ دوو كۆڵبه‌ره‌كه‌ باسیان له‌وه‌ كردووه‌، دوو كۆڵبه‌ری دیكه‌یان له‌گه‌ڵدا بووه‌ له‌و كاته‌ی كه‌وتوونه‌ته‌ ناو بۆسه‌ی پاسداران، به‌ڵام چاره‌نووسیان نازانن.

ئ. م