دەنگۆی دواخستنی كۆنگرەی یەكێتی گەرمتر دەبێت

K24 - سلێمانی

پرسی دواخستنی کۆنگرەی یەکێتی نیشتمانی كوردستان گەرمتر بووە، ئەمەش دوای ئەوەی کە کۆنفرانسی مەڵبەندەکان دواخرا و تائێستا ئەنجام نەدراوە، دەنگۆکانی دواخستنی كۆنگرەش رێکخستنەکانی یەکێتی نیگەران کردووە. ئەندامیکی مەکتەبی سیاسی یەکێتیش دەڵێت" دەبێ کۆنگرە ئەنجام بدرێت".

عەدنان موفتی، ئەندامی مەكتەبی سیاسی یەكێتی بە كوردستان24ی راگەیاند: "دەبێ كۆنگرە لەكاتی خۆی بكرێت، ئەو دۆخەی ئێستا لە عێراق ھەیە كێ دەڵێ ھەر بەردەوام نابێت، ئەگەر ئەوە ھۆكارێك بێت بە پێچەوانەوە دەبێ بەپەلە بكرێت لە ئەنجامدانی كۆنگرە و یەكێتی بچێتە قۆناغێكی تر كە بتوانێ مامەڵە لەگەڵ پێشھاتەكان بكات و دۆخی ناوخۆی رێكبخاتەوە".

بڕیارە لە کۆنفرانسی مەڵبەند و مەکتەبەکان 500 کەسی دیکە وەک ئەندامی کۆنگرە ھەڵبژێردرێن، ئەم قۆناغەیان بەیەک جاری دیمەنەکە روون دەکاتەوەو رەنگە ململانێکانی کۆنگرەی یەكێتی بباتە قۆناغێکی ئاڵۆزترەوە.

فەھمی بورھان، ئەندامی مەکتەبی رێکخستنی یەکێتی دەڵێ: "دەنگۆی دواخستنی كۆنگرە نیگەرانی لای ھەموو ئۆرگانەكانی یەكێتی دروستكردووە، بەڵام روونكردنەوەی لیژنەی باڵای ھەڵبژاردن ئەمەی بە تەواوی روونكردەوە كە كۆنگرە دواناخرێت".

یەکێتی لە 1/7/2010 کۆنگرەی سێیەمی خۆی بەست، ئەوەش بەگوێرەی پەیڕەوی ناوخۆ دەبێت ھەر سێ ساڵ جارێک کۆنگرە ببەستێت.