"هانده‌رانی بارسێلۆنا هه‌واڵێكی كوشنده‌یان پێگه‌یشت"

عوسمان دێمبلی یاریزانی فره‌نسی یانه‌ی بارسێلۆنا به‌هۆی پێكانه‌وه‌ تا وه‌رزی داهاتوو ناگه‌ڕێته‌وه‌ یاریكردن.

ئه‌مشه‌و 11 شووباتی 2020، بارسێلۆنا له‌سه‌ر پێگه‌ی خۆی به‌یاننامه‌یه‌كی بڵاو كرده‌وه‌ و تێیدا جه‌ختی له‌وه‌ كرده‌وه‌ كه‌ تا 6 مانگی دیكه‌ عوسمان دێمبلی به‌هۆی پێكانه‌وه‌ ناگه‌ڕێته‌وه‌ یاریكردن، ئه‌مه‌ش له‌ كاتێكدایه‌ بارسێلۆنا بۆ ئه‌م وه‌رزه‌ لویس سوارێزشی له‌ده‌ستداوه‌ و هیچ هێرشبه‌رێكی نوێ له‌ گواستنه‌وه‌ی زستانه‌ نه‌كڕیوه‌.

دێمبڵی له‌ مانگی نۆڤێمبه‌ری ساڵی رابردوو له‌ یاریی یانه‌كه‌ی به‌رامبه‌ر بۆرووسیا دۆرتمۆند له‌ چامپیۆنزلیگ تووشی پێكان بوو به‌هۆیه‌وه‌ بۆ ماوه‌ی دوو مانگ و پازده‌ رۆژ دووركه‌وته‌وه‌، به‌ڵام له‌سه‌ره‌تای ئه‌م مانگه‌ گه‌ڕایه‌وه‌، دوای چه‌ند رۆژێك دوای گه‌ڕانه‌وه‌ی بۆ راهێنانه‌ به‌ كۆمه‌ڵه‌كان ده‌ركه‌وت كه‌ هێشتا به‌ ته‌واوه‌تی چاك نه‌بووه‌ته‌وه‌ و به‌هۆی ئازاری ماسولكه‌كانی راهێنانه‌كانی بارسێلۆنا جێهێشته‌وه‌ و سه‌رله‌نوێ پێكانه‌كه‌ی سه‌ریهه‌ڵدایه‌وه‌.

عوسمان دێمبلی له‌ هاوینی 2017 له‌ یانه‌ی دۆرتمۆنده‌وه‌ به‌ به‌های 125 ملیۆن یۆرۆ روویكرده‌ بارسێلۆنا، له‌گه‌ڵ ئه‌و یانه‌یه‌ له‌ كۆی 74 یاری 19 گۆڵ و 17 ئاسیستی كردووه‌.