وه‌زاره‌تی ته‌ندروستی ئامارێكی نوێی كه‌رنتینه‌كراوانی راگه‌یاند

K24 – هه‌ولێر‌:

وه‌زاره‌تی ته‌ندروستی حكومه‌تی هه‌رێمی كوردستان، له‌ به‌یاننامه‌یه‌كدا ئاماری نوێی تووشبووان و كه‌ره‌نتینه‌كراوانی له‌ هه‌رێمی كوردستان راگه‌یاند.

له‌ به‌یاننامه‌كه‌دا هاتووه‌: "لە ماوەی 24 کاتژمێری ڕابردوو پشکنین بۆ 39 هاووڵاتی گومانلێکراو ئەنجامدراوە لە هەرێمی کوردستان و گشت ئەنجامەکان نێگەتیڤ بووە، واتە هەڵگری ڤایرۆسی کۆڕۆنای نوێ COVID-19  نین".

ده‌قی به‌یاننامه‌كه‌

بەیاننامەیەك لە وەزارەتی تەندروستی

لە درێژەی ڕێکارەکانی خۆپارێزی وەزارەتی تەندروستی بۆ رێگە گرتن لە بڵاوبوونەوەی ڤایرۆسی کۆڕۆنای نوێ COVID-19 هەڵمەتی پشکنینی گومانلێکراوانی هەڵگری ڤایرۆسی کۆرۆنای نوێ COVID-19 و لە ماوەی 24 کاتژمێری رابردوو پشکنین بۆ 39 هاووڵاتی گومانلێکراو ئەنجامدراوە لە هەرێمی کوردستان و گشت ئه‌نجامەکان نێگەتیڤ بووە واتە هەڵگری ڤایرۆسی کۆڕۆنای نوێ COVID-19  نین.

دوای راگەیاندنی 5 هاووڵاتی کە هەڵگری ڤایرۆسی کۆرۆنای نوێ لە ئێستادا باری تەندروستیان زۆر باشە و جێگیرە بێ ئەوەی پێویستیان بە هیچ چارەسەریەك هەبێت تەنها لەژێر چاودێری پزیشکین و لە کاتی پێویستبوونیان بە چارەسەری پزیشکی ئەوا کاری پێویستیان بۆ ئەنجام دەدرێت، و هەروەها لە رێگەی تیمەکانی چاودێری تەندروستی توانرا پشکنین بۆ ئەو کەسانەش بکرێت کە هاوەڵی ئەو کەسانەیان کردووە کە هەڵگری ڤایرۆسی کۆرۆنای نوێن.

دوای زیادبوونی ژمارەی تووشبوان لە ووڵاتی ئێران و تۆمارکردنی چەند حاڵەتێکی تر لە پارێزگاکانی ناوەڕاست و باشووری عێراق ئەوا تێمەکانی تەندروستی لە بازگە ناوەخۆییەکانیش دەست بەکاربوون بۆ پشکنینی ئەو هاووڵاتیانەی کە سەردانی شارەکانی هەرێم دەکەن بۆ دۆزینەوەی گومانلێکراوان، و لە ئێستادا ژمارەی ئەو هاووڵاتیانەی کە لە کەرەنتینەکانن ژمارەیان 2564 هاووڵاتین کە دابەشکراون بەسەر شارەکانی هەولێر(1174) سلێمانی (535) دهۆك (449) هەڵەبجە (82) گەرمیان (208) ڕاپەڕین (104) کۆیە (12) و تیمە تەندروستیەکان چاودێریان دەکەن بۆ چارەسەری پێویست لە کاتی روودانی بارێکی لەناکاو.

      وەزارەتی تەندروستی        

حکومەتی هەرێمی کوردستان

        3ی ئازاری2020