روونکردنەوەیەک لە ژووری بازرگانی و پیشەسازییەوە سەبارەت بەخۆراک و پێداویستی هاووڵاتیان

K24 – هه‌ولێر:          

ژووری بازرگانی و پیشەسازی سلێمانی دڵنیایی دەدات بەسەرجەم هاووڵاتیان لە هەرێمی کوردستان لە زۆری پێداویستیە خۆراکییەکان لە ناو کۆگا بازرگانییەکان.

سیروان محەمەد، سەرۆکی ژووری بازرگانی و پیشەسازی سلێمانی رایگەیاند، تەواوی پێداویستیە خۆراکییەکان لە کۆگاکانی بازرگانان هەیەو پڕن لەخۆراک و پێداویستی هاووڵاتیان، هاوردەکردنی کاڵاو شتومەکیش بەردەوامی  هەیە.  دەیان هەزار تۆن خۆراک لە به‌نده‌ر عه‌باس و  باشماخەوە بەرە سلێمانی هاتووە و هیچ کێشەو گرفتێکی خۆراکمان نییە لەشاری سلێمانی.

راشیگەیاند، داوا لە تەواوی هاووڵاتیان دەکەین کە پێویستناکات بەو جۆرە پەلاماری خۆراک و بازاڕەکان بدەن چونکە ئەم بارودۆخە کاتیە و بەهەوڵ و توانای هەموان بەسەلامەتی تێی دەپەڕێنین.