عێراق داوای كۆبوونەوەی بەپەلەی ئۆپێك دەكات

K24 - ھەولێر

دوای ئەوەی نرخی نەوت بە رێژەیەكی بەرچاو دابەزی، وەزیری نەوتی عێراق داوای كۆبوونەوەی بەپەلەی ئۆپێك دەكات.

سامر غه‌زبان، وه‌زیری نه‌وتی عێراقی نامه‌یه‌كی به‌په‌له‌ بۆ وڵاتانی ئه‌ندام و نائه‌ندامی ئۆپێك ده‌نێریت، داوای كۆبونه‌وه‌ی به‌په‌له‌ی رێكخراوه‌كه‌ ده‌كات، ئه‌مه‌ دوای ئه‌وه‌ دێت  نرخی نه‌وتی خاو له‌ بازاڕه‌كانی جیهان به‌ شێوه‌یه‌كی به‌رچاو دابه‌زی و له‌ 2016ه‌وه‌ به‌و نرخه‌ نه‌فرۆشراوه‌.

ئه‌مڕۆ نرخی یه‌ك به‌رمیل نه‌وتی خاوی برێنت به‌ كه‌متر له‌ 29 دۆلار فرۆشرا.

هاوكات نرخی گرێبه‌سته‌ دواخراوه‌كان بۆ مانگی ئایاری داهاتوو به‌ رێژه‌ی 3.76% دابه‌زی و نرخی به‌رمیلێك برێنت له‌و گرێبه‌ستانه‌ دابه‌زی بۆ 28.92 دۆلار، هه‌روه‌ها نرخی به‌رمیلێك نه‌وتی خاوی خۆرئاوا ته‌كساس له‌ گرێبه‌سته‌ دواخراوه‌كان به‌ رێژه‌ی 3.1% دابه‌زی و بۆ هه‌ر به‌رمیلێك 28.1 دۆلار دانراوه‌، رێکنەکەوتنی وڵاتانی ئۆپێک پڵەسیش لەنێویاندا سعودیەی گەورەترین بەرهەمهێنەری نەوتی نێو ئۆپێک و رووسیای دەرەوەی رێکخراوەکە، فشاری زیاتری خستووەتە سەر بازاڕی نەوت و ئەو دوو وڵاتەش رایانگەیاندووە بەرهەمهێنانی نەوت بەرزدەکەنەوە.