سیاسی

ئه‌و یاریزانه‌ی منداڵه‌كه‌ی به‌هۆی كۆرۆنا كوشت سزای هه‌تاهه‌تایی به‌سه‌ردا سه‌پێندرا

تا پزیشكه‌كان گه‌یشتن كار له‌كار ترازابوو

جیهان

K24- هه‌ولێر:

ئه‌و یاریزانه‌ی تۆپی پێی‌ یانه‌ی "یڵدرم سپۆر"ـی توركی كه‌ منداڵه‌ 5 ساڵانه‌ییه‌كه‌ی به‌هۆی تووشبوونی به‌ ڤایرۆسی كۆرۆنا كوشت، سزای زیندانیكردنی هه‌تاهه‌تایی به‌سه‌ردا سه‌پێندرا.

دوای تێپه‌ڕبوونی 11 رۆژ به‌سه‌ر به‌خاكسپاردنی كوڕه‌كه‌ی، جه‌وهه‌ر تۆكتاش، یاریزانه‌ 33 ساڵییه‌كه‌ چووه‌ بنكه‌ی پۆلیس و دانی به‌ تاوانه‌كه‌یدا نا، له‌ ماوه‌ی چه‌ند رۆژی رابردووشدا ئه‌و بابه‌ته‌ له‌ میدیاكان هه‌رای ناوه‌ته‌وه‌ و پۆلیسی توركیاش بڕیاریدا ته‌رمی منداڵه‌كه‌ له‌ گۆڕ ده‌ربهێندرێته‌وه‌، بۆ ئه‌وه‌ی ره‌وانه‌ی پزیشكی داد بكرێت و لێكۆڵینه‌وه‌ی توێكاری بۆ ته‌رمه‌كه‌ی بكرێت.

چیرۆكی كوشتنی ئه‌و منداڵه‌ به‌و شێوه‌یه‌ بوو، كه‌ به‌هۆی به‌رزبوونه‌وه‌ی پله‌ی گه‌رمی له‌شی و تا و له‌زری به‌هێز ره‌وانه‌ی نه‌خۆشخانه‌ی كه‌ره‌نتینه‌ كرا و باوكیشی یاوه‌ری ده‌كرد.

له‌كاتێكیشدا به‌هۆی په‌تاكه‌ كوڕه‌ منداڵه‌كه‌ به‌سه‌ختی هه‌ناسه‌ی ده‌دا، باوكیشی ئه‌مه‌ی به‌ ده‌رفه‌ت زانی، بۆ ئه‌وه‌ی بیكوژێت و بۆ ماوه‌ی 15 خوله‌ك بالیفی له‌سه‌ر ده‌می كوڕه‌كه‌ی دانا، به‌و هۆیه‌شه‌وه‌ كوڕه‌كه‌ خنكا، هه‌رچه‌ند باوكه‌كه‌ دواتر رایكرده‌ لای پزیشكان بۆ ئه‌وه‌ی به‌هانای منداڵه‌كه‌یه‌وه‌ بێن، به‌ڵام تا گه‌یشتنی پزیشكه‌كان كار له‌كار ترازابوو و نه‌یانتوانی رزگاری بكه‌ن.

له‌ تۆماره‌كانی نه‌خۆشخانه‌ش به‌و شێوه‌یه‌ تۆماركراوه‌، كه‌ منداڵه‌كه‌ به‌هۆی كۆرۆنا تووشی هه‌ناسه‌ته‌نگییه‌كی سه‌خت بووه‌ته‌وه‌ و گیانی له‌ده‌ستداوه‌.

به‌ڵام سه‌باره‌ت به‌ هۆكاره‌ یاساییه‌كه‌ "جینایه‌تییه‌كه‌"، میدیاكانی توركیا له‌ باوكه‌ بكوژه‌كه‌ گواستییانه‌وه‌‌، هه‌ر له‌ سه‌ره‌تای له‌دایكبوونییه‌وه‌ ئه‌و كوڕه‌كه‌ی خۆش نه‌ویستووه‌ و له‌ نه‌خۆشخانه‌ش ئه‌وه‌نده‌ی دیكه‌ ده‌روونی داڕووخابوو.

دوای 4 رۆژ له‌ دانپێدانانی تۆكتاش به‌ كوشتنی كوڕه‌كه‌ی به‌ ناوی "قاسم"، ئه‌و یاریزانه‌ توركه‌ وێنه‌ی گۆڕی كوڕه‌كه‌ی له‌ هه‌ژماری تایبه‌تی خۆی له‌ فه‌یسبووك بڵاوكرده‌وه‌ و به‌ چه‌ند وشه‌یه‌ك كۆمێنتی له‌سه‌ر نووسیوه‌.

H.B

 

هۆشیار بەنانی ,