هێمن هەورامی: ئەو دۆخە خراپەی بەسەر سنووری سلێمانیدا هاتووە سەرانی یەکێتی لێی بەرپرسن

هێمن هەورامی، ئەندامی مەکتەبی سیاسی پارتی دەڵێت: "ئەو دۆخە خراپەی بەسەر سنووری سلێمانیدا هاتووە لە بوونی کارگەی ماددەی هۆشبەر و تیرۆر و تۆقاندن و دزی و تاڵان، سەرانی ئێستای یەکێتی نیشتمانی لێی بەرپرسن".

هێمن هەورامی، ئەندامی مەکتەبی سیاسیی پارتی دیموکراتی کوردستان لە بەرنامەی( ئێکس)ـی کوردستان24 کە کۆڤان عزەت پێشکەشی دەکات، ئاماژەی بەوە کرد: "دۆخی خراپی سنووری سلێمانی، سەرانی ئێستای یەکێتی لێی بەرپرسیارن؛ ئێستا ئەگەر سەیری بارودۆخی سلێمانی بکەین، لە دروستکردنی ماددەی هۆشبەر و کارگەری ماددەی هۆشبەر، ڕێژەی تیرۆر و تۆقاندن، ڕاوەدوونانی سەرمایەگوزارانی ناوخۆ و بیانی، ئەو دۆخەی بەسەر فڕۆکەخانەی سلێمانیدا هاتووە، تاڵانکردنی خاڵە سنوورییەکان، سەرانی ئێستای یەکێتی نیشتمانی کوردستان لێی بەرپرسن، لەبەر ئەوە دەگەڕێینەوە سەر سندووقەکانی دەنگدان، خەڵکی کوردستان حوکمڕانیی پارتییان بینیووە و تێکدانی دۆخی سلێمانیشیان بینیووە. خەڵکی کوردستان ڕێگەو بانەکانی هەولێر و دهۆکیان بینیووە، ڕێگەو بانەکانی سنووری سلێمانیشیان بینیووە، ئارامی و سەقامگیریی و ئاسایشی هەولێر و دهۆکیان بینیووە، تیرۆرکردنی ئاریە چایچییەکان و تۆقاندنی سنووری سلێمانیشیان بینیووە".

پێنجشەممە 10ـی تشرینی یەکەمی 2024، دژە تیرۆری کوردستان بڵاوی کردەوە: "لە ماوەی ڕابردوودا لەسەر بنەمای زانیاریی پێشوەختە، کارگەیەکی بەرهەمهێنانی ماددەی هۆشبەر لە گوندی ئاوبارەی ناحیەی مەیدان لە نزیک قەزای دەربەندیخان، لە لایەن دامەزراوەکانی حکوومەتی فیدراڵ دەستی بەسەردا گیرا، جگە لە ئامێر و دەزگاکانی کارگەکە، نزیکەی دوو تۆن لە ماددەی هۆشبەر لە جۆری کەپتاگۆنی بەرهەمهێنراوی ئەو کارگەیەی تێدا بووە".

دژە تیرۆری کوردستان ڕایدەگەیەنێت: "ئەم کارگەیە بە ئاگاداری و لەژێر سەرپەرشتیی سەرانی تازەی (ی. ن. ک) دامەزرا بوو، دەسەڵاتدارانی سلێمانی هەموو هەوڵێکی خۆیان لەگەڵ حکوومەتی فیدراڵ خستەگەڕ تا چاوپۆشییان لێ بکرێت و بابەتەکە لە مێدیا و ڕاگەیاندنەکان بشاردرێتەوە یاخود بە قەبارەیەکی گەورە باس نەکرێت".