تاڵیبان هیواخوازە لە ماوەی سەرۆکایەتیی ترەمپدا لە لیستی تیرۆریستی دوور بخرێتەوە
سوهەیل شاهین، بەرپرسی نووسینگەی سیاسی تاڵیبان لە قەتەر ڕایگەیاند، بزووتنەوەی تاڵیبان پێشبینی دەکات لە ماوەی خولی دۆناڵد ترەمپ لە لیستی ڕێکخراوە تیرۆریستییەکانی ئەمەریکا دوور بخرێتەوە.
سوهەیل بە ئاژانسی ئاڕ ئای نۆڤۆستی ڕاگەیاند: بێگومان ئێستە شەڕ کۆتایی هاتووە و لە قۆناغێکی نوێداین، هیچ مانایەکی نییە ئەندامەکانمان لە لیستیی تیرۆردا بمێننەوە.
ئاماژەی بەوەشکرد، لە خولی یەکەمی ترەمپدا، ئەمەریکا و تاڵیبان گەیشتنە ڕێککەوتن کە ململانێی نێوانیان ڕاگرت و ڕێگەی بە کۆتایی هاتنی بوونی ئەمەریکا لە ئەفغانستان دا کە 20 ساڵی خایاند.
پێشتریش یوری ئوشاکۆڤ، یاریدەدەری سەرۆک کۆماری ڕووسیا بە ڕۆژنامەنووسانی ڕاگەیاندبوو کە لە ئێستەدا ڕووسیا کار بۆ لابردنی تاڵیبان لە لیستی ڕێکخراوە تیرۆریستییەکانی ڕووسیا دەکات.