كوردستان24 پرۆژە گەورەكەی راگەیاند

كوردستان24 لەپێناو خزمەتی زیاتری وەرزشوانانی كوردستان و هاندانی یاریزانان و راهێنەران و گۆڵپارێزان پرۆژە گەورەكەی راگەیاند، لەمەودوا هەفتانە و مانگانە خەڵاتە ناوازەكانی كوردستان24 پێشكەش دەكرێن.
كوردستان24 لە پاڵ خەڵاتی ئەستێرەی هەفتەی خولی ئەستێرەكانی عێراق لەگەڵ دەستپێكی یەكەمین گەڕی وەرزی نوێی خولی نایابی كوردستان پرۆژەیەكی دیكەی راگەیاند و خەڵاتی جوانترین گۆڵ، باشترین راهێنەر و باشترین یاریزان و باشترین گۆڵپارێز بە سیستەمێكی جیهانی دەبەخشێت.

خەڵاتی باشترین یاریزان
محەمەد حەمید هێرشبەری یانەی رزگاری لە یەكەمین ئەزموونی یانەكەی لە خولی نایابی كوردستان سەركردایەتی بردنەوەیەكی مێژوویی كرد، كاتێك ئەو یاریزانە كەلارییە كە بە حەمە چەپە ناسراوە دوو گۆڵ و ئاسیستێكی بەرامبەر زاخۆ كرد و یانەكەی لە یەكەمین بەشداریكردنی لە خولی نایاب سەركەوتنێكی گەورەی بەدەستهێنا.

خەڵاتی باشترین راهێنەر
مەولود رەمەزان راهێنەرە لاوەكەی پیشەسازی وەرزی رابردوو توانی بۆ یەكەمجار یانەكەی بۆ خولی نایابی كوردستان سەربخات و لە یەكەمین یاریش لە مێژووی خولەكە توانی لە دەرەوەی یاریگەی خۆیان سەركەوتن بەرامبەر دەربەندیخان بەدەستبهێنن، بەمەش ئەو راهێنەرەی پیشەسازی خەڵاتی باشترین راهێنەری گەڕی یەكەمی خولی نایابی كوردستانی بەدەستهێنا.

جوانترین گۆڵ
كێبڕكێی نێوان ئەركان مەنسور هێرشبەری ئاكرێ و دڵدار خدر بەرگریكاری پێشمەرگەی هەولێر لەسەر بەدەستهێنانی خەڵاتی جوانترین گۆڵی هەفتەیە گەیشتە لوتكە، بەڵام دواجار هێرشبەرەكەی ئاكرێ كە بە هەوڵێكی تاكەكەسی لە گەڕی یەكەم گۆڵێكی نایابی بەرامبەر چوارقوڕنە تۆمار كرد و خەڵاتە ناوازەكەی كوردستان24ـی مسۆگەر كرد.

لەمەودوا خەڵاتەكان چۆن دابەش دەكرێن؟
كوردستان24 بۆ هەموو هەفتەیەك خەڵاتی جوانترین گۆڵ دەبەخشێت، بەڵام خەڵاتی باشترین یاریزان، باشترین راهێنەر و باشترین گۆڵپارێزی خولی نایابی كوردستان دەكاتە 
مانگانە و بەپشتبەستن بە ئامارەكان و هەڵسەنگاندنی رۆژنامەنووسان و بە دەنگی كاپتن و راهێنەرەكان مانگانە باشترینەكان دەستنیشان دەكات و خەڵاتەكان دابەش دەكات.