ئیخڵاس دلێمی: ئامانجی سەردانەکەی سوودانی بۆ هەولێر چارەکردنی کێشەکانە
بڕیار وایه سه‌رۆك وه‌زیرانی عێراق سه‌ردانی هه‌رێمی كوردستان بكات؛ هاوكات په‌رله‌مانتارێكی پارتی له په‌رله‌مانی عێراق ئاماژه به‌وه ده‌كات، سه‌ردانه‌كه بۆ چاره‌كردنی كێشه و ئاڵنگارییه‌كانی نێوان به‌غدا و هه‌ولێره.
سێشه‌ممه، 12ـی تشرینی دووه‌می 2024، ئیخڵاس دلێمی، په‌رله‌مانتاری پارتی دیموكراتی كوردستان له په‌رله‌مانی عێراق ڕایگه‌یاند: سه‌ردانه‌كه‌ی محه‌ممه‌د شیاع سوودانی، سه‌رۆك وه‌زیرانی عێراق لە ڕۆژی چوارشه‌ممه، 13ـی تشرینی دووه‌می 2024، بۆ هه‌رێمی كوردستان به ئامانجی چاره‌كردنی كێشه و ئاڵنگارییه‌كانی نێوان به‌غدا و هه‌ولێره.
دلێمی له به‌شێكی دیكه‌ی لێدوانه‌كه‌یدا ئاماژه‌ی به‌وه كرد، سوودانی هه‌روه‌ها له سه‌ردانه‌كه‌یدا پیرۆزبایی له لایه‌نه براوه‌كانی هه‌ڵبژاردنی په‌رله‌مانی كوردستان ده‌كات و پێشهاته‌كانی تایبه‌ت به پێكهێنانی كابینه‌ی نوێی حكوومه‌تی هه‌رێمی كوردستان تاوتوێ ده‌كات.
ئه‌و په‌رله‌مانتاره‌ی پارتی ڕوونیشی كرده‌وه، سوودانی سه‌ره‌تا سه‌ردانی هه‌ولێر ده‌كات و پاشان ده‌چێته سلێمانی بۆ پیرۆزبایی لایه‌نه براوه‌كانی هه‌ڵبژاردنی په‌رله‌مانی كوردستان.