مێپس24 لە پەرلەمانی تورکیا هەرا دەنێتەوە

ئەحمەد داوود ئۆغلو سەرۆکی پارتی ئاییندە لەسەر بەشداریکردنی لە کۆڕبەندی ئاشتی و ئاسایشی ڕۆژهەڵاتی ناوەڕاست (مێپس24) لە دهۆک، تورکیا وەڵامی قسەکانی دەوڵەت باخچەلی سەرۆک مەهەپەی دایەوە و گوتی: بەجۆرێک ڕێزم لێگیراوە کە هەرگیز لە تورکیا ئەمجۆرە ڕێزگرتنە نییە".

لە کۆبوونەوەی پەرلەمانی تورکیا، دەوڵەت باخچەلی ڕەخنەی لە ئەحمەد داوود ئۆغلۆ سەرۆکی پارتی ئاییندە و سەرۆک وەزیرانی پێشووی تورکیا گرت لەسەر ئەوەی سەردانی هەرێمی کوردستانی کردووە و لە شاری دهۆک بەشداری کۆڕبەندی مێپس24 بووە و پانێلیشی هەبووە.

باخچەلی سەردانەکەی داوود ئۆغلۆ بە مەترسی بۆ سەر بەهێزتر و فراوانتر بوونی پەیوەندییەکانی تورکیا و هەرێمی کوردستان دەزانێت و دەشڵێت: "کۆماری تورکیا لەسەر بنەمای یەکسانی دامەزراوە و تاوەکوو ئەمڕۆکەش هیچ کەسێک لەم یەکسانییە بێ بەش نەبووە و بە دەر لە تورکیاش هیچ شوێنێک بە ناوی کوردستان نییە".

لە وەڵامی دەوڵەت باخچەلی، سەرۆکی پارتی ئاییندەی تورکیا ڕایگەیاند، کەسایەتی سیاسی و ئەکادیمیستی زیاتر لە 40 وڵات بەشداری کۆڕبەندی ئاشتی و ئاسایشی ڕۆژهەڵاتی ناوەڕاست (مێپس24) بوون، ئەمەش دەرفەتێک بووە بۆ بینینی سەرۆک بارزانی و سەرۆک کۆماری عێراق و مەسرور بارزانی سەرۆکی حکوومەتی هەرێمی کوردستان و بەرپرسانی دیکەی سیاسیی عێراق و هەرێمی کوردستان.

گوتیشی: لەم سەردانەدا بەشێوەیەک ڕێزم لێگیراوە کە هەرگیز لە تورکیا بەم جۆرە ڕێز لە کەس ناگیرێت، هەربۆیە لێرەوە پەیامێک ئاراستەی سیاسییەکانی ئەنقەرە دەکەم کە لەم دۆخە هەستیارەدا پێویستە بەرژەوەندییە سیاسییەکانمان بەلاوە بنێنین و گرنگە ڕووبەڕوو گفتوگۆ بکەین، چونکە پێکهاتەی تورکمان لە هەرێمی کوردستان مافەکانیان تەواو پارێزراوە.

هەروا ئاماژەیدا، کە مێدیاکارانی هەرێمی کوردستان و عێراق پرسیاری پرۆسەی ئاشتیان لێیکردووە، بەڵام لەبەر ئەوەی زانیاریی وردی لەبارەی پرۆسەکەوە نەبووە نەیتوانیوە جگە لە بۆچوونی خۆی هیچی تر بڵێت.

هەینی ڕابردوو 22ـی تشرینی دووەمی 2024، کۆڕبەندی مێپس24 لە زانکۆی ئەمەریکی - کوردستان لە دهۆک، بە سپۆنسەری مێدیایی کوردستان24 دەستی پێکرد و بۆ دوو ڕۆژ بەردەوام بوو.

نزیکەی 124 ئەکادیمیست لە 40 وڵاتی جیاوازەوە بەشداریی کۆڕبەندەکە بوون، هەروەها ژمارەیەک پانێل و وۆرکشۆپ لەبارەی دۆخی ئێستەی جیهان و ڕۆژهەڵاتی ناوەڕاست بەڕێوە چوون.