وەزارەتی ناوخۆ سەنتەری ڕاوێژکاری کۆچ لە پارێزگای سلێمانی دادەمەزرێنێت

وەزارەتی ناوخۆی حکوومەتی هەرێمی کوردستان، سەنتەری ڕاوێژکاری کۆچ لە پارێزگای سلێمانی دادەمەزرێنێت بۆ مەبەستی هۆشیار کردنەوەی کۆمەڵگە لە مەترسییەکانی کۆچی نایاسایی.

بەمەبەستی هۆشیارکردنەوەی کۆمەڵگا و کەمکردنەوەی مەترسییەکانی کۆچی نایاسایی، ناوەندی هاوبەشی هەماهەنگی قەیرانەکانی وەزارەتی ناوخۆی حکوومەتی هەرێمی کوردستان دوای ئەوەی بەسەرپەرشتی ڕێبەر ئەحمەد، وەزیری ناوخۆی حکوومەتی هەرێمی کوردستان، سەنتەری ڕاوێژکاری کۆچ لە هەرێمی کوردستان ڕاگەیاند و لقی یەکەمی لە پارێزگای هەولێر کردەوە، بەم نزیکانەش بە پشتیوانی دامەزراوەی کۆچی سویدی، لقی دووەم لە پارێزگای سلێمانی دادەمەزرێنێت.

پێنجشەممە 28ناوەندی هاوبەشی هەماهەنگی قەیرانەکانی وەزارەتی ناوخۆی حکوومەتی هەرێمی کوردستان ڕایدەگەیەنێت:سەنتەرەکە کار دەکات لەسەر هۆشیارکردنەوەی کۆمەڵگا لە مەترسییەکانی کۆچی نایاسایی، هەروەها ڕێنوێنیکردنی گەنجان بۆ ئەم هەل و دەرفەتانەی کە بەردەستن لە ناوەوە و دەرەوەی هەرێمی کوردستان، لەگەڵ پێشکەشکردنی ڕاوێژکاری بەردەوام بۆ گەنجان لە بابەتی جیاوازدا.

ناوەندەکە ئاماژە بەوە دەکات کە هەرێمی کوردستان نۆیەم ووڵاتە سەنتەری ڕاوێژکاری کۆچی تێیدا دامەزراوە، چەندین وەزارەت و لایەن لە بەڕێوبردنی سەنتەرەکە بەشدارن، دەشڵێت: یەکێك لە کارەکانی دیکەی سەنتەرەکە بریتییە لە پێشکەشکردنی ڕاوێژکاری بەو بیانیانەی دێنە هەرێمی کوردستان و ئاشنا کردنیان بە یاسا و ڕێنماییەکانی کە لە ناوەوەی هەرێمی کوردستان بەردەستن.

دەشڵێت: لە ئێستادا وەزارەتی ناوخۆی حکوومەتی هەرێمی کوردستان، سەرقاڵی دامەزراندنی سەنتەرەکەیە لە پارێزگای سلێمانی، بۆ ئەم مەبەستەش ماوەی هەفتەیەکە چەندین کۆبوونەوەیان لەگەڵ دامەزراوەی کۆچی وڵاتی سوید ئەنجامداوە کەپشتیوانی سەنتەرەکەدەکەن، وەهەروەها ڕاهێنان بە چەندین کارمەند لە وەزارەتی ناوخۆ و بەڕێوبەرایەتی کۆچ و کۆچبەرانی پارێزگای سلێمانی کراوە و ڕاهێنانەکان بەردەوامن، لە ئایندەیەکی نزیکدا بەفەرمی سەنتەرەکە لە پارێزگای سلێمانی ڕادەگەیەندرێت و دەکەوێته کارەوە، دواتر کار بۆ دامەزراندنی لەتەواوی پارێزگاو ئیدارە سەربەخۆکان دەکرێت، بۆئەم مەبەستەش ئەمڕۆ بەڕێوەبەری گشتی ناوەندی هاوبەشی هەماهەنی قەیرانەکان لەکۆتا ڕۆژی سەردانەکەیان بۆ هەرێمی کوردستان، سوپاسی وڵاتی سوید و ڕێکخراوی ICMPD کرد بۆ پشتیوانیان، هاوکات چەندین پلان بۆ داهاتووی کارکردنی هەردوولا بڕیاری لەسەردرا