بە پشتیوانیی کابینەی نۆیەم سەنتەری دڵ لە هەولێر، نوێترین خزمەتگوزاریی تەندروستی پێشکەش دەکات
سەنتەری دڵ لە هەولێر وەک یەکێک لە باشترین سەنتەرەکانی چارەکردنی نەخۆشییەکانی دڵ، جێگەی بایەخی کابینەی نۆیەم و سەرۆکوەزیران مەسرور بارزانی بووە.
لە کابینەی نۆ، سەنتەری دڵ فراوان کرا، ژمارەی قەرەوێلەکانی لە 52 قەرەوێلەوە کراوەتە 140 قەرەوێلە و بەشی تایبەت بە منداڵان و سیستەمی ڕیسایکلینی ئاو، کۆگای سەردەمییانە و چەندین بەشی نوێی بۆ زیاد کراوە؛ هەروەها 75%ی کارەبای بەکارهاتووی سەنتەرەکە لە وزەی خۆرەوە بەرهەم دەهێنرێت.
شوان عوسمان، سەرۆکی بەشی قەستەرە و نەخۆشییەکانی دڵ بە فەرمانگەی مێدیا و زانیاری ڕاگهیاند: "پێشتر تەنها یەک ڕاوێژکاریی نەخۆشیەکانی دڵ و یەک سۆنەری دڵ هەبوو، ئێستە کراوەتە سێ ڕاوێژکار و سێ سۆنەری دڵ، ڕۆژانە دەتوانین پشکنین و سۆنەری دڵ بۆ 150 نەخۆش بکەین."
لە سەرانسەری عێراقەوە نەخۆش سەردانی سەنتەری دڵ دەکەن. لە 10 مانگی ڕابردووی ئەمساڵ، زیاتر لە 80 هەزار نەخۆش سەردانی سەنتەرەکەیان کردووە و 1287 نەشتەرگەری کردنەوەی سینگ کراوە کە لە 41% یان دانیشتووی هەرێمی کوردستان نین.
هەروەها نزیکەی 4 هەزار شەبەکە و باڵۆن دانراون.
ئێستە سەنتەرەکە خاوەن کۆگایەکی گەورەیە کە کەلوپەلی پێویست بۆ ماوەی 6 مانگی ئاییندە بەردەستە و دەیان ئامێری پێشکەوتووی بۆ دابین کراوە، کە لە عێراق و ناوچەکە نموونەیین.
سەنتەرەکە 24 کاتژمێر کراوەیە و دەیان پزیشک و کارمەندی تەندروستیی شارەزا کاری تێدا دەکەن؛ تێچووی چارەسەریش بەراورد بە نەخۆشخانە تایبەتەکان 80% کەمترە.
كابینەی نۆیەم، بایەخێکی زۆری بە كەرتی تەندروستی داوە و بەردەوامە لە بەرەوپێشبردن و فراوانكردنی ئەم کەرتە لەپێناو خزمەتکردنی زیاتر و کەمکردنەوەی بارگرانیی ماددی لەسەر هاووڵاتییانی هەرێمی کوردستان.