لە خولی نایابی كوردستان چاوەڕوانی گەڕێكی ئاگرین بكەن

لە گەڕی حەوتەمی خولی نایابی کوردستان چەندان رووبەڕووبوونەوەی ئاگرینی تێدایە كە بڕیارە سبەی دووشەممە ئەم گەڕە بە ئەنجامدانی 3 یاریی دەست پێ بكات، لە یاریی لوتكەدا رزگاری و پیشەسازی كە ئەم وەرزە بۆ خولی نایابی كوردستان سەركەوتوون بۆ یەكەمجار لە مێژووی خۆیاندا لەم خولە بەیەك دەگەن.

رزگاری ـ پیشەسازی

یانەی پیشەسازی دوای 353 رۆژ جارێكی دیكە سەردانی گەرمیان دەكاتەوە و رووبەڕووی یانەی رزگاری دەبێتەوە، بەوپێیەی دوایینجار لە خولی پلەیەكی كوردستان لە رۆژی 21/12/2023 بەرامبەر یەكتر یارییان كردووە، ئەوكاتیش یارییەكە لەنێو یاریگەی رزگاری بە 2 گۆڵ بۆ هەرلایەكیان كۆتایی هاتبوو.

ئەم دوو یانەیە وەرزی رابردوو پلەكانی یەكەم و دووەمی خولی پلەیەكی كوردستانیان گرت و بۆ یەكەمجار لە مێژوویاندا بۆ خولی نایابی كوردستان سەركەوتن.

پیشەسازی بەبێ ئەوەی هیچ یارییەك بدۆڕێنێت و بە كۆكردنەوەی 13 خاڵ پلەی دووەمی ریزبەندی خولی نایابی كوردستانی گرتووە، لەبەرامبەردا یانەی رزگاری لە كۆی 5 یاری 2 سەركەوتن و 2 یەكسان و شكستێكی هەیە و بە كۆكردنەوەی 8 خاڵ لە پلەی حەوتەمی ریزبەندی دێت.

زاخۆ ـ برایەتی

ئەم دوو یانەیە دۆخی دەروونیان بە تەواوەتی جیاوازە، برایەتی هەفتەیەكی بەئازاری تێپەڕ كرد، بەوپێیەی ئەو 3 خاڵەی بەرامبەر پێشمەرگە بەدەستیهێنا لێ وەرگیرایەوە، ئەمەش كاریگەرییەكی خراپی بۆ یاریی دواتریش دروست كرد و كاتێك لە نێو یاریگەی خۆیان بەرامبەر ئاكرێ تووشی شكست بوون.

لە بەرامبەردا زاخۆ لە دۆخێكی دروونی باش دایە و لە گەری رابردووش توانی لە دەرەوەی یاریگەی خۆی بەخاڵێک لە یاریگەی پێشمەرگەی هەولێر بگەڕێتەوە، ئەمەش دۆخیكی جێگیری لە یانەكە دروست كردووە و بەبێ هیچ كێشەیەك بۆ میوانداریكردنی برایەتی ئامادەن.

 زاخۆ خاوەنی 11 خاڵە و لە خانەی چوارەمی ریزبەندییەکە دێت و تەنیا 2 خاڵ لە یانەی پیشەسازی دووەمی ریزبەندی دوورە، لەبەرامبەردا یانەی برایەتی لە كۆی 6 یاری، تەنیا 2 سەركەوتنی بۆ هەژمار كرا و بە كۆكردنەوەی 7 خاڵ بۆ خانەی دەیەمی ریزبەندی دابەزیوە.

ئاکرێ ـ هەندرێن

یانەی ئاکرێ لە یاریگەی خۆی میوانداریی یانەی هەندرێن دەکات، ئاکرێ بە راهێنەرایەتی وەلید محەممەد خۆی بۆ ئەم یارییە ئامادەکردووە، کوڕانی ئاکرێ بە پاڵپشتی هاندەرانیان دەیانەوێت ئەنجامێکی باش بەدەدستبێنن و دۆڕانی گەڕی رابردوو بەرامبەر پیشەسازی لە بیری هاندەران ببەنەوە، بەڵام ئەمە ئاسان نییە، چونکە بەرامبەر یانەیەک یاری دەکات شەڕی مان و نەمان دەکات و لە دۆخێکی خراپ دایە، چونكە هەندرێنی نوێنەرەكەی پایتەخت لە ئەگەری هەر ئەنجامێكی خراپ رەنگە مەترسی لەسەر دوورخرانەوەی راهێنەرەكەی دروست بكات، بەوپێیەی یانەكە بە راهێنەرایەتی دڵشاد مەعروف بە خراپترین قۆناغی خۆیدا تێدەپەڕێت و لەم وەرزە هیچ سەركەوتنێكی تۆمار نەكردووە.