وەزیری دەرەوەی سووریا گەیشتە قەتەر
یەکشەممە، 5ـی کانوونی دووەمی 2025، وەزیری دەرەوەی حکوومەتی کاتیی سووریا بەسەردانێکی فەرمی گەیشتە دەوحە.
تەلەفزیۆنی سووریا بڵاوی کردەوە، شاندێکی سووریا کە پێک هاتوون لە ئەسعەد شیبانی، وەزیری دەرەوەی سووریا و مەرهەف ئەبو قەسرە، وەزیری بەرگری و ئەنەس خەتاب، سەرۆکی دەزگای هەواڵگری گشتیی گەیشتنە قەتەر.
ڕۆژی شەممە، ئەسعەد شیبانی، وەزیری دەرەوەی سووریا لە پلاتفۆرمی ئێکس ڕایگەیاند "لەم هەفتەیەدا بەنوێنەرایەتیی وڵاتەکەم، سەردانی فەرمیی هەریەک لە قەتەر، ئیمارات و ئوردن دەکەم."
ئاماژەی بەوەش دا "بەوپەڕی خۆشحاڵییەوە ئەم سەردانانە دەکەین بۆ پشتگیریی لە سەقامگیری، ئاسایش، بوژانەوەی ئابووری و بنیاتنانی هاوبەشییەکی بەهێز."