شاندی بازرگانی 10 پارێزگای رۆژهەڵات و ناوەڕاستی تورکیا سەردانی دهۆکیان کرد
عەلی تەتەر، پارێزگاری دهۆک پێشوازیی لە بەرپرسی دۆسیەی بازرگانی کونسوڵخانەی تورکیا لە کوردستان و 10 شاندی بازرگانی پارێزگاکانی رۆژهەڵات و ناوەڕاستی تورکیا کرد.
لە کۆبوونەوەیەکدا کە شکری جەمیل، بەرێوەبەری ژووری بازرگانی پارێزگای دهۆک ئامادەبوو، باس لە سەردانەکەی مەسرور بارزانی سەرۆکی حکوومەتی هەرێمی کوردستان بۆ تورکیا و دیدارەکانی لەگەڵ سەرۆک کۆمار و بەرپرسانی دیکەی ئەو وڵاتە کرا بۆ پەرەپێدانی پەیوەندیەکانی ئابووری و بازرگانی نێوان عێراق و هەرێمی کوردستان و تورکیا، هەروەها چۆنیەتی پێشخستنی پەیوەندییەکان لە بەرژەوەندی هەر دوو وڵات.
لای خۆیەوە عەلی تەتەر پارێزگاری دهۆک، دووپاتی کردەوە هەرێمی کوردستان پەیوەندییە سیاسی و ئابوورییەکانی نێوان هەرێمی کوردستان و تورکیا لە ئاستێکی بەرزدایە، پارێزگاری دهۆک هیوای خواست بتوانن پەیوەندییەکان لە بەرژوەندی گەلی هەر دوو وڵات دا بەرەو پێشەوە ببەن و پشتیوانی خۆی بۆ هەموو ئاسانکارییەک نیشاندا.
هەر لەو کۆبوونەوەیەدا، گفتوگۆ لەسەر کۆمەڵێک بابەتی دیکە کران کە دەبنە بەربەست لەبەردەم بەهێزکردنی چالاکییە دارایی و بازرگانییەکان.
بەپێ سەرچاوە باوەڕپێکراوەکان ئاستی ئاڵوگۆڕی بازرگانی نێوان عێراق و هەرێمی کوردستان و تورکیا لە ساڵی 2024 گەیشتووەتە 13 ملیار دۆلار، پێشبینیش دەکرێت تا ساڵی 2025 قەبارەی ئاڵوگۆڕی بازرگانی زیاتر بێت.