پارتی دیموکراتی کوردستان لە ساڵیادی 11ـی ئادار جەخت لە ڕێکخستنی نێو ماڵی کوردستان دەکاتەوە

مەکتەبی سیاسیی پارتی دیموکراتی کوردستان، بەبۆنەی 55مین ساڵیادی ڕێککەوتننامەی 11ـی ئاداری 1970 په‌یامێكی بڵاو كرده‌وه‌ کە تێیدا هاتووە، هەڵگیرسانی شۆڕشی ئەیلوولی مەزن لەو سەردەمە دژوار و سەختەی ئەوسادا، وەک ڕووداوێکی گرنگ ڕۆڵ و سەنگی بزووتنەوەی ڕزگاریخوازیی بۆ قۆناغێکی سیاسی پێشکەوتووتر گواستەوە و توانی چەندین دەستکەوتی گرنگ و مێژووییش بەدی بێنێ لەوانەش، ڕێککەوتننامەی 11ـی ئاداری 1970ـیە.

له‌ په‌یامه‌كه‌ی مەکتەبی سیاسیی پارتی دیموکراتی کوردستاندا هاتووه‌ "ئەو ڕێککەوتننامەیە کاریگەری زۆری هەبوو بەسەر بزاڤی ڕزگاریخوازی و نەتەوەیی و نیشتمانیمان، هەم وەک دۆکیۆمێنتێکی سیاسی و یاسایی ناسرا و هەمیش لەبەرئەوەی یەکە جار بوو حکوومەتی عێراق ناچار بکرێت دان بنێت بە مافە سیاسی و نەتەوەیی و ئیدارییەکانی گەلەکەمان، هەروەها پەنا بەرێتە بەر گفتوگۆ بۆ چارەسەرکردنی مەسەلەی کورد لە عیراقدا."

ده‌قی په‌یامه‌كه‌ی مەکتەبی سیاسیی پارتی دیموکراتی کوردستان بەبۆنەی 55مین ساڵیادی ڕێککەوتننامەی 11ـی ئاداری 1970.

پەیامی مەکتەبی سیاسیی پارتی دیموکراتی کوردستان بەبۆنەی(٥٥)یەمین ساڵیادی ڕێککەوتننامەی (11ـی ئاداری 1970)

مێژووی هاوچەرخی بزووتنەوەی ڕزگاریخوازی گەلەکەمان لە سەردەمە دژوار و سەختەکاندا پەیامێکی ڕاست و دروستی نەتەوەیی و نیشتمانی هەڵگرتبوو، هەر قۆناغێکیش لەو بزووتنەوەیە وەک پێویستییەکی مێژوویی و چارەنووسساز وابوو.

هەڵگیرسانی شۆڕشی ئەیلوولی مەزن لەو سەردەمە دژوار و سەختەی ئەوسادا، وەک ڕووداوێکی گرنگ، ڕۆڵ و سەنگی بزووتنەوەی ڕزگاریخوازیی بۆ قۆناغێکی سیاسی پێشکەوتووتر گواستەوە بە جۆرێك، لەسەر گۆڕەپانی سیاسی نێوخۆیی و جیهانیدا ئەو بزووتنەوە شۆڕشگێڕییە وەک هێزێکی کاریگەر و خاوەن بڕیار ڕۆڵی شیاوی خۆی بگێڕێ و چەندین دەستکەوتی گرنگ و مێژووییش بەدیبێنێ لەوانەش ڕێککەوتننامەی ١١ی ئاداری ١٩٧٠-یە. 

ڕێککەوتننامەی(١١ی ئادار)، کە لە نێوان سەرکردایەتی شۆڕش بە ڕابەرایەتی بارزانیی نەمر و حکوومەتی ئەوسای عێراق مۆر کرا، دەستکەوتێکی بەرهەمدارى  دەرەنجامی خەبات و خۆڕاگری و قوربانیدانی ڕۆڵەکانی کوردستان و شۆڕشی مەزنی ئەیلوول بوو.

ئەو ڕێککەوتننامەیە کاریگەری زۆری هەبوو بەسەر بزاڤی ڕزگاریخوازی و نەتەوەیی و نیشتمانیمان، هەم وەک دۆکیۆمێنتێکی سیاسی و یاسایی ناسرا و هەمیش لەبەرئەوەی یەکەمجار بوو حکوومەتی عێراق ناچار بکرێت دان بنێت بە مافە سیاسی و نەتەوەیی و ئیدارییەکانی گەلەکەمان، هەروەها پەنا بەرێتە بەر گفتوگۆ بۆ چارەسەرکردنی مەسەلەی کورد لە عیراقدا.

تایبەتمەندی ئەو دەسکەوتە مەزنە لەوەدایە وێڕای ڕەخساندنی زەمینە و بارودۆخێکی نوێی دانوستان و ئاشتەوایی، تا ماوەیەکیش کۆتایی بە شەڕ و کوشتار و ماڵوێرانی هێنا، هەروەها چەند بڕیارێکی مەبدەئی و ڕاستیش درا سەبارەت بە مەسەلەی نەتەوایەتی لە عێراق، هەروەها هەنگاوی بەرچاو نرا بۆ دەستەبەرکردنی مافەکانمان لەوانە: بڕیاردان لەسەر حوکمی زاتی لە کوردستانی عێراق و زمانی کوردی کرا بە دووەم زمانی فەرمی و چەندین دەستکەوتی دیکە.

ڕێککەوتننامەی(11ـی ئادار) لە سەر ئاستی ناوخۆ و دەرەوە دەنگدانەوەیەکی سیاسی هەبوو و، دەرفەتێکی تری ڕەخساند بۆ ناساندنی شوناسی نەتەوەییمان و ڕەوایەتى خەبات و تێکۆشانی گەلەکەمان بۆ گەیشتن بە ئامانجەکانمان و پتەوکردنی بنەماکانی دیموکراسی و پێکەوەژیان لە ناوخۆدا، هەر بۆیەش ئەو ڕێککەوتننامەیە هەنگاوێکی بەسوود بوو بۆ سەرجەم گەلان و پێکهاتە جیاوازەکانی ئەو وڵاتە. 

لەلایەکی دیکەوە ئەو ڕووداوە گرنگە ڕۆڵ و سەنگ و قورسایی بزووتنەوەی ڕزگاریخوازی کوردی بۆ قۆناغێکی سیاسی پێشکەوتووتر گواستەوە بە جۆرێك لەسەر گۆڕەپانی سیاسی نێوخۆیی و جیهانیدا وەک هێزێکی کاریگەر و خاوەن بڕیار ڕۆڵی شیاوی خۆی بگێڕێ.

هاووڵاتیانی ئازیز و خۆڕاگر

ڕۆڵ و پلان و حیکمەتی بارزانیی نەمر لە مۆرکردنی ڕێککەوتننامەی (11ـی ئادار) ئەو ئاواتەی هێنایە دی و ئەو بەڵێنەی بردەسەر بۆ کردنەوەی دەروازەیەکی نوێی ئازادی و سەرفرازی و، ملکەچپێکردنی حکوومەتی عێراق بۆ جێبەجێکردنی بەندەکانی ڕێککەوتنامەکە.

ڕێککەوتننامەی (11ـی ئادار)کە پاش زنجیرەیەک شۆڕش و بەرخودان و خۆڕاگری هاتەئاراوە و لەو قۆناغەیدا بناغەیەکی ڕاست و دروستیشی بۆ چارەسەرکردنی کێشەی کورد و پتەوکردنەوەی یەکڕیزی و رێکخستنەوەی نێو ماڵی کورد داڕشت، هەروەها باشترکردنی ژیانی هاووڵاتییان و بژێوی ژیانیان و پڕۆسەی ئاوەدانی و بنیاتنانەوە. 

ئامانجی سەرەکی و ستراتیجی سەرکردایەتی سیاسی و پارتیمان ئەوسا جێبەجێکردنی یەک بە یەکی بڕگەکانی ئەو ڕێککەوتننامەیە بوو وەک سەرەتای قۆناغێکی نوێ و ئایندەیەکی گەش و بەرهەمدار بۆ گەلەکەمان، بەڵام حکوومەتی ناوەندیی ئەوسای عێراق بە پێچەوانەوە تا دەهات لە جێبەجێکردنی بەندەکانی پاشگەز دەبووەوە، بە هەموو شێوەیەک نەیدەویست ڕێککەوتنامەکە بە ئاکام بگات، بۆیە بەردەوام بوو لە نکوڵیکردن لە شوناسی نەتەوەیی کوردیبوونی کەرکووک و  سەرژمێریی دانیشتوان لەو ناوچانەی زۆرینەیان کورد بوون، هەروەها گۆڕینی دیمۆگرافیای خاک و شێواندنی واقیعی جیۆگرافی و نەتەوەیی و دابڕینیان لە خاکی کوردستان، لەگەڵ ئەوەشدا ئەو ڕێککەوتنامەیە بوو بە بناغەیەکی ڕاست و دروستی پڕۆسەکانی دایالۆگ و گفتوگۆ، کە شۆڕشی کورد لەگەڵ حکوومەتی ناوەندیی عێراق ئەنجامی داوە.

کوردستانیانی بەڕێز!

لەم یادە شکۆمەندە مێژووییەدا، ئێمە لە پارتی دیموکراتی کوردستان، وەک هەمیشە جەخت لەسەر بنەما سەرەکی و نەگۆڕەکان دەکەینەوە، جەخت لەسەر ڕوانگە راستەقینە نەتەوەیی و نیشتمانییەکەمان دەکەینەوە، جەخت لەسەر ڕێکخستنی نێو ماڵی کوردستان دەکەینەوە بەجۆرێک بە هەموو لایەکمان لەسەر پرسە ستراتیجییەكانی كوردستان، لە داكۆكیكردن لە مافە ڕەوا و دەستوورییەكانمان و لە خاكەكەمان و لە دەستكەوت و قەوارە نیشتمانییەکانمان هاوئاراستە و هاوگوتار بین و هەموو هەوڵێكی ڕژد و دڵسۆزانە بدەین لەپێناو چارەسەرکردنی کێشەکان و هەموولایەكمان بەرپرسانە بەرژەوەندیی باڵا و گشتیی خەڵكی كوردستان ڕەچاو بکەین و ئەرکی لەپێشینەمان پاراستنی خاك و خەڵكی كوردستان و ئەم قەوارەیە و دەستکەوتەکانمان بێت.

بیرەوەری ڕێککەوتننامەی (11ـی ئادار) هاوکاتە لەگەڵ ڕۆژژمێری ئازادکردنی شاری هەولێر لە(11ـی ئاداری 1991) بەو بۆنەیەوە پیرۆزباییەکی گەرم  لە ڕۆڵە خۆڕاگرەکانی شاری هەولێری دێرین و پایتەختی هەرێمی کوردستان دەکەین، هیوادارین هەمیشە ئاسوودە و ئارام و لە پێشکەوتندا بن.

لە بیرەوەری ڕێککەوتننامەی (11ـی ئادار) پیرۆزباییەکی گەرم لە جەماوەری دڵسۆزی کوردستان  دەکەین، سەری رێز و نەوازش بۆ شەهیدانی ڕێگای ڕزگاری و سەربەخۆیی کورد و کوردستان دادەنوێنین، سڵاو و ڕێز لە خانەوادە و کەسوکاری سەربەرزی شەهیدە نەمرەکانمان.

سڵاو لە گیانی پاکی بارزانیی نەمر و کاکە ئیدریسی هەمیشە زیندوو.

سڵاو لە بیرەوەری(٥٥) ساڵەی ڕێککەوتنامەی (١١ی ئاداری ١٩٧٠)

بەرز و شەکاوە بێت ئاڵای پیرۆزی کوردستان.  

هەمیشە گەلەکەمان سەربەرز و کوردستانیش هەر ئاوەدان.

مەکتەبی سیاسیی پارتی دیموکراتی کوردستان

11ـی ئاداری 2025