پوتین: پشتگیریی لە پێشنیازیی ئاگربەستی 30 ڕۆژە دەکەم
سه‌رۆكی ڕووسیا پشتگیریی خۆی بۆ ئاگربه‌ستی سی ڕۆژه له‌گه‌ڵ ئۆكرانیا ڕاگه‌یاند؛ ده‌شڵێت، له‌م باره‌وه قسه له‌گه‌ڵ سه‌رۆكی ئه‌مه‌ریكا ده‌كات.
پێنجشه‌ممه، 13ـی ئاداری 2025، ڤلادیمێر پوتین، سه‌رۆكی ڕووسیا ڕاگه‌یاند، پشتگیریی له پێشنیازیی ئاگربه‌ستی سی ڕۆژه له‌گه‌ڵ ئۆكرانیا ده‌كات، به‌ڵام هێشتا ناكۆكی و جیاوازی ورد له‌م باره‌وه هه‌یه و پرسیار ئه‌وه‌یه ئایا ئۆكرانیا ئه‌و ماوه‌یه چۆن وه‌به‌رهێنانی تێدا ده‌كات و ده‌یقۆسێته‌وه.
ڤلادیمێر پوتین ئاماژه‌ی به‌وه‌ش كرد، سه‌باره‌ت به‌م پێشنیازه قسه‌ی زیاتر له‌گه‌ڵ دۆناڵد تره‌مپ، سه‌رۆكی ئه‌مه‌ریكا ده‌كات. گوتیشی، گه‌ڕانه‌وه‌ی هه‌ندێك له هاوبه‌شه ڕۆژئاواییه‌كان بۆ ناو ئه‌و پرۆسانه، سوودی گشتیی ده‌بێت.
پوتین جه‌ختیشی كرده‌وه، ئه‌گه‌ر له‌گه‌ڵ واشنتن ڕێك بكه‌ون، به دڵنیاییه‌وه غازی ڕووسیی جارێكی دیكه هاورده‌ی ئه‌ورووپا ده‌كرێته‌وه.
پێنجشه‌ممه، 13ـی ئاداری 2025، دوو سەرچاوەی ئاگادار بە ئاژانسی "ڕۆیتەرز"ـیان ڕاگەیاند، ڕووسیا لیستی داواکارییەکانی پێشکەش بە ئەمەریکا کردووە بۆ ئەوەی ڕازی بێت بە ڕێککەوتنێک کە کۆتایی بە شەڕی ئۆکرانیا بهێنێت و پەیوەندییەکانی لەگەڵ واشنتن ڕێک بخاتەوە.
هێشتا ڕوون نییە کە داواکارییەکانی ڕووسیا چین، یان ئامادەیە پێش قبووڵکردنی دانوستانەکانی ئاشتی لەگەڵ کیێڤ بچێتە ناو دانوستانەکانی ئاشتییەوە.
ئەو دوو سەرچاوەیە ڕایانگەیاند، بەرپرسانی ڕووسیا و ئەمەریکا لە ماوەی سێ هەفتەی ڕابردوودا لە کاتی دانوستانی ڕاستەوخۆدا باسیان لە مەرجەکان کردووە.
ئەو دوو سەرچاوەیە بارودۆخی کرێملینیان بە ناڕوون و هاوشێوەی ئەو داواکارییانە وەسف کردووە کە پێشتر لە ئۆکرانیا و ئەمەریکا و ناتۆ کردوویەتی.
ئەو مەرجانەی پێشوو بریتی بوون: لە وەرنەگرتنی کیێڤ لە ناتۆ، ڕێککەوتنێک بۆ جێگیرنەکردنی هێزی بیانی لە ئۆکرانیا و دانپێدانانی نێودەوڵەتی بە بە بانگەشەی ڤلادیمێر پوتین، سەرۆکی ڕووسیا بۆ کریمیا و چوار پارێزگای دیکەی ڕووسیا.
هەروەها لە ساڵانی ڕابردوودا ڕووسیا داوای لە ئەمەریکا و ناتۆ کردووە، چارەی ئەو شتانە بکەن کە بە "هۆکاری بنەڕەتی" شەڕەکە وەسفی دەکات، لەوانەش فراوانبوونی ناتۆ بەرەو ڕۆژهەڵات.
لە لایەکی دیکەوە دۆناڵد ترەمپ، سەرۆکی ویلایەتە یەکگرتووەکانی ئەمەریکا چاوەڕوانی بڕیاری پوتین دەکات سەبارەت بە ڕازیبوون بە ئاگربەستی 30 ڕۆژە، کە ڕۆژی سێشەممە ڤۆلۆدیمیر زێلنسکی سەرۆکی ئۆکرانیا ڕایگەیاند "وەک هەنگاوی یەکەم بۆ دانوستانەکانی ئاشتی قبوڵ دەکات."
چوارشەممە، 12ـی ئاداری 2025، دیمیتری پێسکۆڤ، گوتەبێژی کرێملین ڕایگەیاند، گرنگە "پەلە" لە وەڵامدانەوەی ئەو ئاگربەستەی کە واشنتن پێشنیازی کردووە، ناکەین.