بە ڤیدیۆ؛ بەڕێوەچوونی فێستیڤاڵی نەورۆز لە شاری کوڵنی ئەڵمانیا

گوتاری سەرۆک بارزانی لە فێستیڤاڵێکی تایبەت بە جەژنی نەورۆز کە لە شاری کوڵنی ئەڵمانیا بەڕێوە چوو، خوێنرایەوە. 

ئەمڕۆ شەممە، 22-03-2025، هەزاران هاووڵاتیی کوردی دانیشتووی ئەڵمانیا، بە بەرزکردنەوەی ئاڵای کوردستان و وێنەی سەرۆک بارزانی، بەشدارییان لە فێستیڤاڵێکی تایبەت بە جەژنی نەورۆز لە شاری کوڵنی ئەو وڵاتە کرد.

بەشداربووان بە شایی و هەڵپەرکێ و گوتنەوەی گۆرانی و هەڵبەستی کوردی دڵخۆشیی خۆیان بە هاتنەوەی جەژنی نەورۆز دەربڕی. 

شیفا بارزانی، سەرپەرشتیاری ڕەوەندی کوردستانی لە رێورەسمی جەژنی نەورۆز لە کۆڵن پەیامی سەرۆک بارزانی خوێندەوە و ڕایگەیاند، سەرۆک بارزانی بە رێوڕەسمەکە و بە برایەتیی کوردانی هەرچوار پارچەی کوردستان دڵخۆشە.

شیفا بارزانی ئاماژەی بەوەش دا "نەورۆزی ئەمساڵ جەژن نییە، بەڵکوو بۆ هاوسۆزی و پشتیوانییە بۆ خوشک و برایانمان لە ڕۆژئاوای کوردستان. پشتیوانی خۆمان بۆ کوردانی رۆژئاوا دووپات دەکەینەوە و داوا لە کۆمەڵگەی نێودەوڵەتی دەکەین مافی کورد لە هەرچوار پارچەی کوردستان لە هەر چوار وڵات بچەسپێنن."

شیفا بارزانی دووپاتیشی کردەوە "نەورۆز نیشانەی نوێبوونەوە و گەشانەوەیە، سیمبولی سەرکەوتنە، سەرکەوتنەکانی کورد لە نەورۆزدا دەستیان پێکردووە."

ڕۆژی پێنجشەممە، 20-03-2025، سەرۆک بارزانی و مەسرور بارزانی، سەرۆکی حکوومەتی هەرێمی کوردستان لەگەڵ دەیان باڵیۆز، کونسوڵ و نوێنەری وڵاتان بەشدارییان لە ئاهەنگی نەورۆزی ئاکرێ کرد.