باڵێکی گۆڕان کۆنفرانسی دەست پێ کرد و باڵەکەی دیکەش ئەم هەفتەیە دەیکات
باڵی گردی زەرگەتەی بزووتنەوەی گۆڕان دەستی بە کارەکانی سێیەمین کۆنفرانسی بزووتنەوەکە کرد. باڵی کوردساتی بزووتنەوەکەش، کۆتایی ئەم هەفتەیە دەیکات.
ئەمڕۆ شەممە، 05-04-2025، باڵی گردی زەرگەتەی بزووتنەوەی گۆڕان، لە ژێر دروشمی "هاونیشمانی، دەستوور و دیموکراسی" دەستی بە کارەکانی سێیەمین کۆنفرانسی بزووتنەوەکە کرد.
یاسین حەمەعەلی، گوتەبێژی کۆنفرانسی باڵی گردی زەرگەتەی بزووتنەوەی گۆڕان، لە کۆنفرانسێکی ڕۆژنامەوانیدا ڕایگەیاند " ئامانج لە کۆنفرانسەکە، دووبارە هەستاندنەوەی بزووتنەوەکەیە و بڕیارە هەر ئەمڕۆ کۆتایی بە هەموو کارەکانی بهێنرێت. ئەگەر زۆر پێویست بکات، لەوانەیە کاتەکەی زیاتر درێژ بکرێتەوە."
گوتەبێژی کۆنفرانسی باڵی گردی زەرگەتەی بزووتنەوەی گۆڕان باسی لەوەش کرد "ئەم کۆنفرانسە یاساییە و لە ژێر ڕۆشنایی ڕاسپاردەکانی کۆمسیۆنی باڵای سەربەخۆی هەڵبژاردنەکانی عێراق بەڕێوە دەچێت و نوێنەریان بەشدارە." گوتیشی: کۆنفرانسەکە بۆ هەموو گۆڕانخوازانە و دڵ و دەرگاشمان کراوەیە بۆ هەرکەسێک بیەوێت بەشداری بکات.
هاوژین جەمال، پەیامنێری کوردستان24 ڕایگەیاند، کۆنفرانسەکەی باڵی گردی زەرگەتەی بزووتنەوەی گۆڕان بە بەشداریی زیاتر لە هەزار و 200 ئەندام بەڕێوە دەچێت و 53 ئەندامی جڤاتی نیشتمانی هەڵدەبژێردرێن.
پەیامنێری کوردستان24 ئاماژەی بەوەش دا، چاوەڕێ دەکرێت لە کۆنفرانسەکە پەیڕەوی ناوخۆ هەموار بکرێتەوە و بڕیار لەسەر لادانی لۆگۆی کۆنفرانسی دووەمی بزووتنەوەکە بدرێت و لۆگۆ کۆنەکەی یەکەم جار بەکار بهێنرێتەوە.
ئەمە لە کاتێکدایە، باڵی کوردساتی بزووتەوەی گۆڕانیش ڕایگەیاندووە، لەسەر ڕاسپاردەی بڕیاری سەرۆکی کۆمسیۆنی باڵای سەربەخۆی هەڵبژاردنەکانی عێراق و پاڵپشت بە نووسراوی فەرمانگەی پارت و رێکخراوە سیاسییەکان ژمارە (875)، لە ڕێککەوتی (27/3/2025)، بە فەرمی ئاگادار کراونەتەوە بۆ بەستنی کۆنفرانسی نیشتمانیی بزووتنەوەکە لە ڕۆژی پێنجشەممەی داهاتوو، 10-04-2025.
ڕۆڤان سەروەت، ڕێپێدراوی باڵی کوردساتی بزووتنەوەی گۆڕان لە لقی سلێمانی کۆمیسیۆنی هەڵبژاردنەکانی عێراق، بە هاوژین جەمال، پەیامنێری كوردستان24ی ڕاگەیاند، ئامادەكارییان كردووە بۆ ئەوەی كۆنفرانسی نیشتمانی ببەستن و پەیڕەو نووسراوەتەوە و نوێنەری فەرمیی كۆمیسیۆنی باڵای سەربەخۆی ھەڵبژاردنەكانی عێراق ئامادە دەبێت.
ڕۆڤان سەروەت، كۆنفرانسی باڵی گۆڕانی گردی زەرگەتە بە "نایاسایی" ناو دەبات و چونكە وەکوو خۆی دەڵێت: "نوێنەری كۆمیسیون ئامادە نابێت". گوتیشی: بۆ کۆنفرانسەکە هەموو ئامادەکارییەکیان لەژێر ڕاسپاردە و ڕێنماییەکانی فەرمانگەی پارت وڕێکخراوە سیاسییەکانی کۆمیسیۆنی باڵای سەربەخۆی هەڵبژاردنەکان و ئۆفیسی پارێزگای سلێمانی کۆمیسیۆن کردووە.
ئەو ڕێپێدراوەی گۆڕان لە لقی سلێمانی کۆمیسیۆنی هەڵبژاردنەکان گوتی: بە نووسراوی فەرمانگەی پارت و ڕێکخراوە سیاسییەکان ژمارە (875)، لە ڕێککەوتی 2-3-2025، بە فەرمی ئاگادار کراینەوە بۆ بەستنی کۆنفرانسی نیشتمانیی بزووتنەوەی گۆڕان.