سەرۆک بارزانی بۆ سیاسییەکانی عێراق و کوردستان: دەبێت جورئەتتان هەبێت، دان بە هەڵەکانتاندا بنێن

سەرۆک بارزانی داوا لە هێزە سیاسییەکانی عێراق و هەرێمی کوردستان دەکات لاپەڕەیەکی نوێ هەڵبدەنەوە و دەڵێت: دەبێت جورئەتی ئەوەیان هەبێت، دان بە هەڵەکاندا بنێن.

چوارشەممە، 09-04-2025، سەرۆک بارزانی لە گوتاری کردنەوەی 17ـەمین پێشانگەی نێودەوڵەتیی هەولێر بۆ کتێب، باسی لە چەند بابەتێک کرد، یەکێک لەوان، دۆخی عێراقی لە دوای ساڵی 2003 و چارەکردنی کێشە هەڵپەسێردراوەکانی نێوان هەردوو حکوومەتی هەرێمی کوردستان و عێراق بوون. 

وەکوو ئەوەی سەرۆک بارزانی ئاماژەی پێ دا، لە دوای ڕووخانی ڕژێمی بەعس لە ساڵی 2003، عێراقی تازە لەسەر هەرسێ بنەمای سەرەکیی هاوبەشی، هاوسەنگی و سازان دامەزرێنرا "بەڵام بەداخەوە ئیلتیزامی پێ نەکرا."

سەرۆک بارزانی بە ئاماژەدان بەوەی "تا حەددێکی باش" بەشێکی کێشەکانی هەولێر و بەغدا چارە کراون. بەڵام دووپاتی کردەوە، بەشێکی زۆری کێشەکان تاوەکوو ئێستە چارە نەکراون و بە هەڵپەسێردراوی ماونەتەوە. 

سەرۆک بارزانی جەختیشی لەوە کردەوە، جێبەجێکردنی هەر سێ بنەمای هاوبەشی، هاوسەنگی و سازان و پابەندبوون بە دەستووری ساڵی 2005ـی عێراق، کە کورد ڕۆڵێکی سەرەکیی لە نووسینەوەیدا بینی و سەدا 85ـی خەڵكی عێراق دەنگی پێ دا، تاکە ڕێگەیە بۆ چارەکردنی بنەڕەتیی هەموو کێشەکان. وەکوو خۆی باسی کرد، ئەگەر لە سەرەتاوە دەستوور و ئەو سێ بنەمایە جێبەجێ کرابان، بەشێکی زۆری گرفتەکانی ئێستەی عێراق سەریان هەڵنەدەدا و پەیوەندییەکانی هەولێر و بەغداش کێشەیان تێ نەدەکەوت. 

 سەرۆک بارزانی ئامادەیی و پشتیوانیی خۆی بۆ چارەکردنی کێشەکانی هەولێر و بەغدا دووپات کردەوە و بە پێویستیشی دەزانێت هێزە سیاسییەکانی عێراق و هەرێمی کوردستان "جورئەتی ئەوەیان هەبێت، دان بە هەڵەکاندا بنێن و دیسان لاپەڕەیەکی تازە بکەنەوە بۆ ئەوەی عێراقیش تووشی گرفتی گەورەتر نەبێت."