پاڵەوانە كوردەكەی جیهان گەیشتە هەرێمی كوردستان

 عەگید کابایێل، ئەو بۆکسێنەرە كوردەی بە ئامادەبوونی كریستیانۆ ڕۆناڵدۆ توانی شكست بە یەكێك لە ڕكابەرە سەرسەختەكانی بهێنێت و ئەمڕۆش بە سەردانێك گەیشتە هەرێمی كوردستان.
 عەگید كابایێل، دوو مانگ پێش ئێستا بووە پاڵەوان دەبلیو بی سی، كاتێك لە دوایین قۆناغی یەكلاكەرەوەی پاڵەوانێتییەكە شكستی بە ڕكابەرەكەی هێنا و پلەی یەكەمی لە جیهان لەسەر ئاستی ئەو كێبڕكێیە بەدەست هێنا. لە سەرەتای ئەمساڵیش، عەگید، لە سعوودیە بە ئامادەبوونی كریستیانۆ ڕۆناڵدۆ بووە پاڵەوانی بۆكسێنی جیهانی و لە قۆناغی كۆتایی شكستی بە "پیاوە زەبەلاحەكە"ـی جیهان هێنا.
ئەمرۆ دووشەممە، 14 نیسانی 2025، عەگید كابایێل لە  فرۆكەخانەی نێودەوڵەتیی هەولێرەوە گەیشتە هەرێمی كوردستان و لە یەكەمین لێدوانیشی دا بۆ كوردستان24، ڕایگەیاند كریستیانۆ ڕۆناڵدۆ هاوڕێی ئەوە و باشترین یاریزانی مێژووە.

 عەگید، تا ئێستا بەشداریی 36 شەڕی کردووە و تامی دۆڕانی نەکردووە، بۆکسێنەرە كوردەكەی خەڵکی باکووری کوردستانە لە دوایین پاڵەوانێتی بەشداریی لە پاڵەوانێتی جیهانی WBC کرد، پاڵەوانێتییەکە لە ڕیازی پایتەختی سعوودیە بەڕێوەچوو، لە قۆناغی شەشەم و کۆتاییدا، عەگید لە کێشی قورس هەمووانی شۆک کرد و توانی ژیلی ژانگی چینی ناسراو بە (زەبەلاحە چینییەکە) تووشی شکست بکات و لە کێشی قورس بووە پاڵەوان.
 عەگید كاباییل، بۆكسێنەری كورد لە ساڵی 1992 لە شاری لیڤەرکوزنی ئەڵمانیا لەدایک بووە و لەبەر ئەمەش بە نوێنەرایەتیی ئەڵمانیا بەشداریی لە پاڵەوانێتییەکان دەکات، خێزانەکەی لە ناوچەی پازارچیک لە مەرەشی باکووری کوردستانەوە بۆ ئەڵمانیا کۆچیان کردووە. عەگیت لە ساڵی 2011 دەستی بە یاریکردن کردووە و چەندین نازناوی بەدەست هێناوە و یەکێکە لە بۆکسێنەرە دیارەکانی ئەوروپا.